Еҥ-влак деке эн лишыл улмыштлан нуным тыге лӱмдат. Тений «Калык участковый» российысе конкурсын регионысо этапыштыже Сергей Ерошкин чылаштым ончылтен. Тудо Россий МВД-н «Козьмодемьянский» межмуниципальный отделыштыже тырша. Элгӧргӧ паша органыште служитлаш С.Ерошкин 2009 ийыште тӱҥалын. 2014 ий гыч – полицийын кугурак участковый уполномоченныйже.
Школ годсо шонымаш
Сергей Ерошкинын тукымыштыжо элгӧргӧ паша органыште служитлыше-влак уке улыт. А тудо 10-шо классыште тунеммыж годымак милицийыш (кызыт – полиций) пашаш пураш шонен пыштен. Да кажне кечын ямдылалташ тӱҥалын. Эрдене да кастене физподготовко дене заниматлен. Тыгак историй, право ден обществознанийым келгын тунемын. Но шонымашыже тунам шукталтын огыл – медосмотрым эртен кертын огыл.
Садлан рвезылан МарГТУ-ш (кызыт – ПГТУ) тунемаш пураш логалын, «Промышленное и гражданское строительство» специальностьым ойырен налын. Нылымше курсышто тунеммыж годым ОВД-ш пашаш пураш адак миен – ончыч армийыш миен толаш кӱлеш манын вашештеныт тудлан тушто. Рвезе тыгак ыштен да, служитлен толмекыже, арня гычак полиций отдел начальникын кабинетыштыже шинчен. Ындыже тудым пашаш налыныт. Але марте С.Ерошкин ты отделыштак участковыйлан тырша.
Неле, но оҥай
Службыжо Сергей Ерошкинлан келша, вӱдыштӧ кол гай улам манын шкеж нерген ойла.
– Икымше кече гычак пуйто шке верышкем логалынам гай чучын. Коллектив пеш порын вашлийын, мом йодам – опытан коллегем-влак эре полшеныт. Ынде шкежат тыгай опытан еҥыш савырненам да самырык-влакым туныктем. Чаманен каласыман, самырык-шамыч службыш толыт да шукылан огыт кучалт. Эмоциональный нагрузкым огыт чыте, – манеш участковый.
С.Ерошкинын административный участкыштыже – 14 тӱжем наре еҥ. Кажне кечын мо-гынат ышталтеш манын палдара участковый. Паша оҥай, но неле. Шукерте огыл участкысе ик ялыште пӧрт йӱлен. Пожарный-влак тулым йӧртеныт. Тушто илыше айдемым ны илышым, ны колышым муын огытыл.
– А мый палем да шижам: пожар олмышто капше лийшаш. Кольмо дене ломыжым пел метр келгытыш кӱнченам да айдемын йӱлышӧ капшым пургед луктынам. Нелылык ок чактаре, тиде пашам кӧ-гынат вет ыштышаш.
Еҥ-влак уремыште иктаж уда ситуацийыш логалыт, мутлан, арверыштым шолыштыт, вурседылыт але кучедалытат – чыла тиде участковый гоч эрта. Вет иктаж-мо уда лийын кая гын, эн ончыч полицийым ӱжыктат.
Ӧрдыж гыч ончымаште участковый лияш нимо нелыже уке манын шоналташ лиеш: участкет мучко коштат але кудалыштат, икте дене пелештет, весе дене мутым вашталтет. Вуйым кӧргышкырак чыкен ончалаш гын, пашам ышташ кӱлмым умылет. Кажне кечын да йӱдымат – осал пашам ыштыше-шамыч шагатым огыт ончо, – каласкала С.Ерошкин.
Тудын мутшо почеш, участковый калык дене кылым муын, мутланен моштышаш. Скромный еҥлан участковый лияш неле. Да пашам ышташ кумыл йомшаш огыл.
Службыж нерген участковый тыгеат таҥастарен каласыш:
– Операцийым ыштымыж годым хирург айдемын капышкыже инструмент дене пура гын, участковый айдемын вуйышкыжо пураш тырша. Мутлан, шолыштшо еҥым кучаш манын, шкем тудын олмышко шындыман да вор семын шоныман. Тыгай годым свидетель ден видеокамер-влак, шке участкым сайын палыме полшат. Опыт лийшаш, а тудыжым нимогай окса дене тӱлен от нал, лач тыршыме дене веле.
Чылажымат шӱм вошт колтыман огыл маныт гынат, проблемын рӱдыжым палыде, туддеч утлаш ок лий. Формым чийымеке, ме роботыш огына савырне: мом ыштышаш улам, тудым шуктем да йӧра манын, серлагыман огыл. Айда-лийже пашам ыштыше-шамычат участковый пашаште кужун огыт кучалт.
Тӱткырак лийза!
Осал паша-влак коклаште кугу верым мошенничество ден информационно-коммуникационный технологий аланыште ыштыме преступлений-влак айлат. Еҥ-шамыч миллион дене теҥгем мошенник-влаклан колтат. Садлан участковый С.Ерошкин тидын шотышто профилактикылан кугу тӱткышым ойыра. Организацийлаш, школлаш лектын коштеш да еҥ-влаклан мошенник-шамычын оптышышкышт ынышт логал манын умылтара.
Уголовный преступлений-влак шагалрак, но улыт. Шке пого деке тӱткырак лийме нергенат участковый палемдыш да пример дене пеҥгыдемдыш. Шукерте огыл участкыштыже ик еҥын автомашинажым шолыштыныт. Транспортым озаже ик ганат тӱкылен огыл улмаш, сравочшымат эре машинашкыжак коден. Видеонаблюдений камерым шындымымат участковый поянлыкым ончыктымылан огыл, лӱдыкшыдымылык шотышто кӱлешан арверлан шотла.
«Ялысе улам»
С.Ерошкин Картук селаште (шке административный участкышкыже пура) ила. Ялысе улам, олаште илен ом керт манын, шкеж нерген ойла пӧръеҥ. Мланде пашам йӧрата, тидыже кужу жап документ-влак дене шинчылтме деч вара вуйым сайынак кандараш полша.
Службо деч каналташ эше ик сай йӧн – спортзалыште жапым эртараш. С.Ерошкин единоборство дене заниматла. Тиде службыштыжат полша – тӱрлӧ ситуаций лиеш, южгунам шкем араленат кертман. Шке селасе клубын оралтыштыже шкешотан спортзалым келыштарен, С.Ерошкин йолташыже-влак дене кӱлеш оборудованийым наледен. Шкеже пошкудо ялысе спортзалыш приём-влакым тунемаш лӱмын коштын. Ынде шкежат подростко-влакым туныкта.
Яра жапыште пӧръеҥ концертыш, театрышкат миен толеш. Участковый уполномоченный-влакын профессионал пайремышт вашеш Сергей Ерошкин коллегыже-шамычлан эн ончыч тазалыкым тылана да тыгак – воктене ӱшанле йолташ-влакым. Молыжым шке тыршымыде дене ыштен налаш лиеш, манеш.
Пайремда дене, мемнан лӱдыкшыдымылык верч тыршыше участковый-влак!
Марий Элысе МВД-н пресс-службыжын колтымо фото-влак.