Кызыт Украина мландыште специальный военный операций кая. Чыланат салтакна-влакын сеҥен толмыштым изин-кугун вучена. Ме нунылан икымше кечыла гычак кертмына семын полшен шогена.
Советский район Öрша селасе бессеребреник Косьма ден Дамиан святой-влак лӱмеш черкыште армийлан сетьым пидаш тӱҥална. Черке пеленак Рушарня школ уло, тушто труд урокым вӱдышö Юрий Петрович Нагаев кок станокым ыштен. Черкыште старосто – Наталья Фёдоровна Кочакова, тудо спонсор-влакым кычалеш, муэш да мыланна ыштышаш материалым конда. Полышым индивидуальный предприниматель Надежда Тойбулатовна Михайлова пуэн шога. Öрша села гыч ӱдырамаш-влак сетьым пидаш кажне кечын коштыт. С.Патрушева, З.Дубникова, Н.Булыгина, Е.Астраханцева, И.страханцева, Н.Кочакова, Г.Иванова, Р.Юферова, Л.Бастракова уло кумылын толыт. Нунын деч моло-шамычат примерым налыт, жапышт лийме семын Г.Чепайкина, Г.Аппакова, О.Кочаков, Т.Воронцова, М.Полушин, Т.Головина, А.Корнев полшен каят. Черкын настоятельже Сергий (Мошкин) ача да матушка Руфина ямдже паша-влакым умбакыже наҥгаяш полшат.
Öрша селасе тӱвыра пöртым вуйлатыше Надежда Михайловна Топорова поро кумылым ончыктымо кугу концертым кок гана эртарен, оксамат ик гана веле огыл поген колтен.
Теле гыч шошо марте Рушарня школыштак окопысо шыште сортам ыштенна, вашке угыч ты пашалан пижына. Парафиным каткалаш пеш неле, сандене чöгыт дене перкалаш да чайникеш шулыкташ кӱлеш. Яра калай банкылашке картон кагазым пӱтырена да фитильым ыштена, шулыктымо парафиным ӱмбакыже темена, тыге окопысо шыште сорта ямде лиеш. Кызыт салтак-влаклан тиде пеш кӱлешан, нуно йодыт.
2-шо классыште тунемше Полина Чепайкина коваже Нина Филипповна Булыгина дене пырля кеҥежым сетьым пидаш коштын. Полинан Артём изаже сарыште кредалеш. Ярослав Ожигановын (йочасадыш коштеш), Миша ден Аня Петровмытын, Яна ден Егор Репинмытын, Арсений ден Алёша Акуловмытын, Даша Олюнинан ачашт СВО-шко шке кумылын элнам аралаш каеныт. Кеҥеж каныш жапыштат армейский але кукшо душым ышташ йоча-влак Рушарня школыш рӱж коштыныт.
Öрша школын завучшо Татьяна Николаевна Нагаева тиде пашам школышто умбакыже виктара. Туныктышо ден воспитатель-влакат öрдыжеш кодын огытыл. Йочасадыште ыштыше Н.А.Садовина ден Е.А.Халтурина 11 кӱпчыкым госпитальлан ургеныт. Поварлан ыштыше А.А.Булыгина мочылам пидеден колтен.
Йоча-влак дене пырля Л.И.Халтурина, Ю.П.Нагаев, Д.Я.Ведерников урок деч вара армейский душым опташ полшат. А мо тыгай армейский але кукшо душ? Тиде мушкылташ ямде комплект. Ик гана кучылташ келыштарыме солыкым, каплан гель деен нӧртымӧ губкым, кум ватке палычкым, инструкцийым пыштена, чылажыматгерметичный пакетлаш пыштена. Тиде душым госпитальыште да сöй пасушто вучат.
Школышто ныл кече жапыште 250 комплектым ыштен колтышна, а Туныктышын кечыже деч вара изирак класслаште тунемше-влак 275 комплектым ыштеныт. Каласен кодыман, нигöмат виеш она ӱж, шке кумылын толыт, ӱчашен, писын ыштат. Йочанажат (1-9 кл.) школыштына 35 икшыве веле. Но могай пашаче да писе кушкыт! Шкеак толыт да полшаш йодыт.
Тиде арнян «Салтаклан серыш» акцийым эртарена, йоча-шамыч серышым возат. 24 октябрьыште поро кумылым ончыктымо кугу концертым клубыштына ончыкташ шонена. Концерт деч ончыч ярмиҥгам йоча, ача-ава, туныктышо-влак эртарат, шке кид дене ыштыме пашаштым ужалат, тиде погымо надырым СВО-шко колтынена.
Рӱж ушнен, паша ончыко кая. Чылажге 88 сетьым пидынна, 2023 окопысо але блиндажный сортам, 2547 комплект кукшо але армейский душым, 84 кӱпчыкым, а молыжым шотлымат огыл, мом гына колтымо огыл. Кочкышым, газ горелкым, газ баллоным, мочылам, эмым, простыньым, вакшыш шартышым да тулеч молымат.
Öрша села гыч 24 рвезе Украина мландыште кредалеш. Ме шкенан пашана дене нунылан вийым ешарена, тушманым сеҥен толаш ӱшаным пуэна.
Кажныже шоналтышаш, шонем: мый мо дене мемнам аралыше салтак-влаклан полшен кертам?
Роза Антропова, марий йылмым туныктышо.
Советский район, Öрша школ.
