Акрет годсекак калык коклаште тыгай ой коштеш: «Еҥын поро шомакше илышым шуя, а кочо шомакше ӱмырымат кӱчыкемден кертеш». Лач ты ой тачысе саманланат келшен толеш. Кунам ме, поснак тӱвыра аланысе пашаеҥ-влак, калыклан шукырак сайым ыштен колтена, кумылжым шке век савыралын моштена, лач тунам гына ме калык пагалымашым сулен налын кертына.
Илышын нелылыкшым калык ынже шиж, саманын торжалыкшылан вуйым ынже саке манын, кажне тӱвыра пӧрт шке пӧрдемыштыже тӱрлӧ сынан мероприятийым эртарен шога. Тек ялысе калык паша деч каналта, шке нелылыкшым ик татлан монда, клубышко пайремым ончаш кайымыж дене шке пошкудыжым вашлиеш да шомакым вашталта. Лач тыге кажне айдемын чонжо йывырта.
Кораксола тӱвыра пӧртыштат чӱчкыдынак могай-гынат мероприятий эртаралтеш. Тачысе кечын шукыжым мемнан тӱвыра пӧртыш кугурак ийготан еҥ-влак толыт. А Кораксола тӱвыра пӧрт пеленысе «Муро кумыл» фольклор ансамбль шке репертуарже гыч нунылан ожнысо муро-влакым йоҥгалтара. Нине муро корныла коча-ковай-влакнан чонышкышт логалыт, нунын сай татыштым, пуламыр жапыштым, ӱдыр-каче лиймыштым ушыш уэш да уэш кондат.
Ансамбльна дене пошкудо яллашкат концерт дене коштына. Икмыняр кече ончыч Йогорсола ялыште концертым ончыктышна. Мемнан репертуарыштына чыла ожнысо муро-влак вел йоҥгышт. А тидыже калыкын чоныш корным виктара. Йогорсола калыклан пеш кугу таум каласымем шуэш тыге шокшын вашлиймылан.
А шукерте огыл мемнан «Муро кумыл» ансамбльнам уло кумылын «Марий Эл» ГТРК-н радиошко унала ӱжыныт ыле. Тыгак ме М.Шкетан лӱмеш театрыш тӱрлӧ спектакльлаш коштына. Шукерте огыл «Элнет» ден «Мӱкш отарым» ончаш мийышна. А вашке «Уш каен йӧратен шындаш…» спектакльым ончаш каена.
Иктешлен каласаш гын, Кораксола тӱвыра пӧртна калыкын чоныш корным муынак шога. А калыкын пагалымашыже мыланна ончыкшымат сайын пашам ышташлан вий-куатым пуа. Тек курым дене тӱвыра пашаеҥ ден калык коклаште пеҥгыде кыл лияш тӱҥалеш!
Елена Григорьева, Кораксола тӱвыра пӧрт вуйлатыше.
Снимкыште: Кораксола тӱвыра пӧртыштӧ эртаралтше пайрем годым; «Муро кумыл» ансамбль ГТРК «Марий Эл радион» поро унаже; Йогорсола ял калыклан концертым ончыктымо годым.