Экскурсоводын тӱнямбал кечыже вашеш Йошкар-Оласе «Доброланч» кочмыверыште туризм аланыште тыршыше-шамычлан марий калык кочкыш дене падарыме мероприятий лийын.
Марий Элысе туризмым вияҥдыме аланыште ятыр аккредитованный специалист тырша. Нуно турист-шамычым кундемнан историйже, тӱвыраже, мотор верлаже дене веле огыл палдарат, тыгак марий кочкыш деке шӱмаҥдат. Йошкар-Оласе икмыняр кочмывер кугезына-шамычын арален кодымо рецептышт почеш тӱрлӧ калык кочкышым ыштат. «Доброланч» кафен специалистше Анастасия Звягина тыгерак мане:
– Мемнан кочмыверыште турист-шамычлан лӱмын менюм ямдыленна. Тудым эн ончыч экскурсовод-влаклан тамлен ончаш манын, пайремышт деч ончыч мероприятийым организоватленна. Вет лач нине специалист-влак кундемышкына толшо уна-шамычым вашлийыт, кушто тамлын кочкаш лиеш, тугай верыш виктарат.
Экскурсовод-шамычлан коло утла тӱрлӧ кочкышым тамлен ончаш ямдыленыт. Нунын коклаште пареҥге, торык, шыл гыч тӱрлымӧ подкогыльо, «Кравец», уржа ложаш гыч кӱэштме пӧчыж когыльо да молат лийыныт. Тыгак «Юшут» салатым палемдыман. Тудым тыште марий калыкын ожнысо рецептше почеш 2025 ийыште ышташ тӱҥалыныт. Салатлан ойыртемалтше тамым шолтымо пареҥге, шинчалан кол, ужар пурса пуат.
Поян ӱстелым марий тӱран солык да моло сӧрастарыш дене келыштареныт. Когыльо ӱмбалнат калыкнан символикыже лийын. Мероприятийыш погынышо участник-влак марий кочкыш турист-шамыч коклаште йодмашан улмым палемденыт. Поснак подкогыльым, соктам тамлен ончаш кумылан улмышт нерген ойленыт.
Палемдыман, ты мероприятийым Марий Элысе Промышленность, торговльо да экономикым вияҥдыме министерстве дене пырля организоватлыме. Тушко тыгак кундемысе туризмым вияҥдыме агентствын, республикысе гид-шамычын ассоциацийыштын еҥже-шамыч толыныт. Нуно регионысо гастрономический туризмым вияҥдаш полшышо-влаклан тауштеныт да тӱрлӧ пӧлек дене палемденыт.
Авторын фотожо-влак.