Марий Элыште «Калык эмлызе – 2021» конкурсым иктешлыме.
«СОГАЗ-Мед»-ын Марий филиалже Марий Элыште медицине пашаеҥ-влак коклаште йӱлаш пурышо конкурсым эртара, эн сайжым ойыра.
Эмлызе-влакын пашаштым аклыме годым пациент-влакын шонымашыштлан эҥертат. Конкурсын тӱҥ цельже – медицине пашаеҥ да пациент коклаште вашкылым пеҥгыдемдаш.
Тений мероприятийышке коронавирус дене черланыше граждан-влаклан полышым пуышо эмлызе-влак ушненыт. «Стационарын эн сай эмлызыже» номинацийыште Йошкар-Оласе эмлымверыште COVID-ан пациент-влакым эмлыме инфекционный отделенийым вуйлатыше врач-инфекционист Людмила Ахиева сеҥышыш лектын. Кокымшо верыште – Медведево ЦРБ-н акушер-гинекологшо Людмила Яковлева.
«Амбулаторно-поликлинический звенон эн сай эмлызыже» номинацийыште икымше верыш Йошкар-Оласе 1-ше No-ан поликлиникын участковый врач-терапевтше Екатерина Жарова лектын, кокымшышто – Сарын ветеранже-влакын Республикысе клинический госпитальыштын участковый врач-терапевтше Галина Печникова.