14 декабрьыште Россий Президент В.Путин кугу пресс-конференцийым эртарен, калык деке вияш эфирыш лектын. Журналист да еҥ-влакын тургыжландарыше тӱрлӧ йодышыштлан вашмутым пуэн.
В.Путин экономикын саеммыж нерген палемден. Тудын мутшо почеш, ВВП 3,5 процентлан кушкын, инфляций 7,5-8 процент марте шуэш, обрабатыватлыше промышленный сатум шукырак ыштен луктыт, пашадар вес ийын 8 процентлан кушкеш.
Пресс-конференцийыште Украиныште эртыше специальный военный операций нергенат йодышлам нӧлталме. В.Путинын палемдымыж почеш, ӱмаште тушко 300 тӱжем еҥым наҥгайыме. 14 сарзе «Российын Геройжо» лӱмым сулен. Кызыт тушко шке кумылын кайыше-влакым погат: 486 тӱжем рвезе тушко ушнен. Сандене кокымшо мобилизаций огеш лий.
«Контрактник-влаклан тӱрлӧ льгото уло, тӱрлӧ полыш пуалтеш. Доброволец-шамыч тыгай полышым налын кертыт мо?» – йодын Йӱдвел Осетий гыч журналист. «Полышым чылалан иктӧр пуыман. Но таче тидын шотышто изиш тӧрлатымаш-влакым пурташ кӱлеш», – манын. В.Путин
Военкор Д.Кулько СВО-што улшо боец-влакын тургыжландарыше йодышыштым президентлан намиен шуктен. Нуно выплатым пуымо пашам саемден колташ, «Защитники Отечества» фондын пашажым аклаш йодыныт. Тыгак нелын сусыргышо боец-влаклан врачебный комиссийым эмлалтме верыштак эрташ йодыныт. Кызыт тидлан кӧра служитлыме часть марте каяшышт логалеш. Весат кумылыштым волта: фронтышто дрон ок сите. В.Путин ситуаций саемеш манын ӱшандарен. Президент палемден: фронтын линийже 2 тӱжем наре меҥге шуйна, сандене чыла верыш тудо жапыштыже миен огеш шу. Но тидын шотышто Российыште производство паша сайын шукталтеш, йотэлла гычат налыт.
Волонтёр-влакын пашаштым президент кӱкшын аклен да тауштен. Нуно СВО-што улшо-влаклан оксам да тӱрлӧ кӱлешан арверым погаш полшат.
Евросоюз дене кылым ыштыме шотышто йодышлан В.Путин каласен: «Ме огыл, нуно мемнан дене кылым кӱрлыныт, шеҥгел планыш мемнам шӱкалаш тӧченыт». Украиныште конфликт кузе тӱҥалмыж нерген каласкален.
У кундемыште врач-влак огыт сите. Тидлан кӧра нуно кечеш кок пачаш шуко пациентым ончат. Тидын нерген Запорожский областьысе Мелитополь областной онкодиспансерын тӱҥ врачше ойлен. В.Путинын палемдымыж почеш, у регион-влаклан таче 2 процентан льготный ипотеке пуалтеш. Но тиде льгото дене у пӧртыштӧ гына илыме верым налаш лиеш. А тыгай пӧрт-влак тушто шагал чоҥалтыт. Сандене ты льготым вторичный рынкыштат кучылташ кӱлеш манын. Врач-влакым пашаш ӱжаш манын, тудо «Земский доктор» программе почеш врачлан 2 млн теҥге марте подъёмный оксам пуаш палемден, фельдшер-влаклан – 1 млн теҥге марте.
Спорт шотыштат мут лектын. Тыгай йодышым Крым гыч самырык спортсмен-влак пуэныт. Нуно президент деч спортзалым ачалаш йодыныт. Спортзалыштым 40 ий ачалыме огыл. Тидлан кӧра спортсмен-влак уремыште заниматлат. В.Путин ты нелылыкым кораҥдаш сӧрен.
Йӱдвел регионлаште илыше еҥ-влакым леве игечан кундемыш кусарыме программе нерген кутырымо. Ты йодышым Коми Республик гыч журналист пуэн. Тидын шотышто Коми Республикыште еҥ-влакым вес верыш кусараш тений 129 сертификатым пуымо. Но черетыште таче 21 тӱжем еҥ шога. Кӧм да кушко кусараш лийме шотышто журналист шке темлымашыжым пуэн. Президентын мутшо почеш, тиде программым кумдаҥден ончалаш кӱлеш.
Пресс-конференцийыште Уголовный кодекс, транспорт, здравоохранений, ялозанлык, самолётостроений да моло теме дене йодыш-шамычым лончылымо. Еҥ-влакым поснак кочкыш сатулан ак шергештме, ЖКХ-лан тариф кушмо да моло йодыш тургыжландара.
Видеоконференций 4 шагатат 4 минут шуйнен. В.Путин тӱрлӧ сфер дене кылдалтше 67 йодышлан вашештен.