6 ноябрьыште Волжский район Приволжский тӱвыра пӧртыштӧ «Марий йӱла пайрем» конкурс эртаралтын.
Тений тушто 12 коллектив (тидыже 80 утла участник) йӱлам палыме шот дене таҥасен. Икымше верыш Пызьырьгуп тӱвыра пӧртын «Шырча» ансамбльже «Кайыккомбо кашта» йӱлам ончыктымыж дене лектын. Кокымшо верыште ты тӱвыра пӧртынак «Саскавий» драматический коллективше ден «Сотнур аршаш» ансамбль улыт. Икымшыже «Ташлама корка» йӱлам почын пуэн гын, кокымшыжо – шочмо сурт гыч ӱдырым луктын наҥгайымашым. Кумшо верыште – Карай калык театр. Тудо ӱдырлан шондыкым погымо йӱла» дене палдарен. «Упшер кундем» фольклор ансамбльлан «Коля сӱан» йӱлам ончыктымыжлан спецпризым кучыктымо.
Тиде конкурс 2018 ий годсек кок ийлан ик гана эртаралтеш. Йӱлам ончыктымо деч вара погынышо калыклан «Шонкалаш таратышк комедий» манын лӱмдымӧ кӱчык метражан фильмым ончыктымо. Фильмыште Волжский районысо тӱвыра пашаеҥ-влак модыт, а тыгай шкешотан пашам режиссёр Е.А.Кудрявцева ямдылен.
СНИМКЫШТЕ:»Саскавий» драматичексий коллектив (вуйлатышышт — Г.В.Гурьянова) «Ташлама корка» йӱлам ончыкта.
Фотом Пызьырьгуп тӱвыра пӧртын соцсетьысе лаштыкше гыч налме.