26 июль — Парашютистын кечыже. Опросым эртаренна.
Мыняр гана парашют дене волен улыда? Мо таратен? Кушто волаш йӧн уло? Тиде яра але оксала? Волымо деч вара могай шижмаш? Молан парашют дене волаш кӱлеш? Тидлан да моло йодышлан вашмутым лудшына-влак возен колтеныт.
Владимир Шикарёв, Морко район, Миклансола:
— ВДВ-ште служитлымем годым тӱрлӧ кӱкшыт гыч (800 м, 1000 м, 1200 м) 15 гана тӧрштенам. Тушто чыланат тӧрштылыт: тидын деч посна — нигузе. Парашют дене волен отыл гын могай десантник улат? Йоҥылыш волен шинчат гын, йолым кӱршташ, илыш денат чеверласаш лиеш. Мый, юмылан тау, сусырген омыл.
Волымо деч вара мландымбалне кугу куаным шижынам: вет нигӧ дене, нигуш пижын омыл, мланде ӱмбалне шогем, нимогай туткарыш логалын омыл.
Адреналиным шижынам, ты войскаште служитлымем дене чот кугешненам. Парашют дене волымаш деч вара пуйто уэш шочат, илышым аклет, вет кажне тӧрштылмаш годым шке тазалыкет да илышет дене модат.
Айдеме парашют дене волынеже гын, тек вола. Тыге тудо шуко сай шижмаш дене пойдаралтеш, шонем. Огеш чамане!
Александр Кушаков, Волжск:
— Мый 14 гана парашют дене воленам. Идалыкыште ик-кок гана волашак тыршем. Йошкар-Олаште тыгай йӧн уло. ДОСААФ-ыште ик гана тӧршташ 4300 теҥгем тӱлем.
Парашют дене волымо мут дене каласаш лийдыме шижмашым конда. Шкендым кайык семын шижат.
2004 ийыште, армийыште улмем годым, икымше гана тӧрштенам. Тунам мый 22 ияш лийынам. Чылажге тушто 10 гана воленам. Кызыт инженер-строительлан пашам ыштем. Спортсмен йолташем дене пырля тӧрштылаш коштына. Тений 2 июльышто нунын дене погынен, парашют дене воленам.
Иван Очетов, Йошкар-Ола:
— Парашют дене 1990 ийыште, 16 ияш лимекем, ДОСААФ гочын воленам. Чылажге — кум гана. Тунам оксам тӱлыман огыл ыле. Самырык ийготан улмем тӧршташ таратен, очини. Волен шичмек чонгештен каемак манын шоненам.
Парашют дене волымо годым инструкцийым шотыш от нал гын, мутат уке, сусыргаш лиеш.
Валентина Семёнова.