Кайык грипп, кораҥ кай!

Тений майыште республикысе ветеринар службо ир колшыре (чайка) тӱшкан колымо вич случайым рашемден.

Тидыже Медведево район Митиксола, Советский посёлкышто, ты районысо Вечын селаште да Йошкар-Олаште ер ден эҥер воктене палдырнен. Кайык-влакын грипп черан улмыштым рашемдыме.

Тидым пытарыме шотышто икмыняр сомылым шуктымо. Марий Элым Вуйлатыше республикысе посна верлаште карантиным увертарыме шотышто указым луктын. Инфекций ынже шарле манын, палемдыме верлаште да нунын йыр 5 меҥге тораште улшо кумдыкышто кайык-влакым виеш поген налме шотышто пунчалым лукмо. Грипп у верлаште ынже лий манын, вольык ден кайыквусым ашныше-влаклан ветеринарно-санитарный правил шотышто умылтарыме.