Санкт-Петербург олаште кадет классыште тунемше ӱдыр-рвезе-влакын XX Всероссийский военно-патриотический слётышт эртаралтын. Тушко элнан тӱрлӧ регионжо гыч кадет класс-влак ушненыт. Марий Эл гыч Йошкар-Оласе 19-ше номеран 8 «Б» Росгвардий классше лийын.
Тенийысе слёт Кугу Ачамланде сарыште сеҥымылан 80 ий да руш адмирал Ф.Ф.Ушаковын шочмыжлан 280 ий теммылан пӧлеклалтын. Садлан конкурс-влак нине лӱмгече-шамыч дене кылдалтше лийыныт. Ӱдыр-рвезе-влак строевой дене коштмо годым мурым йоҥгалтарыме, команде дене патриотизм шӱлышан мурым мурымо, почеламутым да прозым лудмо, спорт да усталык конкурслаште, уш-акылым тергыме таҥасымашлаште вийыштым тергеныт.
19-ше номеран школын кадетше-влак слёт гыч кумшо вер дене пӧртылыныт.
19-ше номеран школын «ВК»-се тӱшкаж гыч налме фото.