Кугу Отечественный сарын да Марий Элысе уголовно-исполнительный системын ветеранже Аркадий Трофимов Йошкар-Оласе 29-ше №-ан школысо кадет-влак дене вашлийын.
Тиде вашлиймаш Российыште эртаралтше «Классные встречи» проект почеш лийын. Тудым республикысе уголовно-исполнительный системын Ветеран-влак советшым вуйлатыше Рудольф Григорьев ден тунемме верын администрацийже эртареныт.
А.Трофимов кадет-шамычлан 1943 ийыште тӱҥалше шке боевой корныж нерген каласкален. Тудым Икымше Дальневосточный фронтыш колтеныт. Инженерно-технический батальонын рядовойжым военный специальность-влаклан – взрывник ден сапёрлан – туныктеныт. Самырык салтак-влак теоритический занятийла деч вара боевой задачым шукташ тӱҥалыныт: фронтлан корным ыштеныт, чек воктеке миным вераҥденыт.
Аркадий Трофимовын сар корныжо шкешотан, вет тудлан тушман ваштареш кредалме жап Кугу Сеҥымаш кечым пайремлыме деч вара тӱҥалын. 1945 ий кеҥежым Мӱндыр Эрвелке ятыр войска ден техникым колтеныт. «Стратегические клещи» манме план пеш кугу лийын: 1500 миллион квадратный километр кумдыкышто тушманым йыр авырен налаш!
1945 ийысе 8 гыч 9 август йӱдым рядовой Трофимов шке полкшо дене пырля кугыжаныш чекым вончен. Япон истребитель-влакын пехотым лӱйкалымышт деч вара нелырак лийын. Ятыр еҥ вуйжым пыштен. Чыла тидыже Сеҥымаш кече деч вара кум тылзе эртымеке… Мемнан салтак-влак самурай-влакын эҥерым вончымаште улшо икте почеш вес огневой точкыштым пытареныт. Тидлан рядовой Трофимовым «За боевые заслуги» медаль дене наградитленыт.
Аркадий Трофимовын тулан жапысе событий-влакым оҥайын каласкалымыже кадет-влаклан путырак келшен. Нуно тӱрлӧ йодышым пуэденыт, а ветеран-шамыч тунемше-влаклан пиалым да тазалыкым тыланеныт. Вара пырля сниматлалтыныт, вет тидыже ик жап гыч историйыш возалт кодеш.
А.Канатеевын фотожо.