Кок ий ончыч, 2019 ий 21 мартыште, Волжск оласе «Звёздный» тӱвыра полатыште ме, «Кугарня» газет редакцийын пашаеҥже-влак, «Воштылаш, товатат, сулык огыл!» конкурс-фестивальын отборочный туржым эртарышна.
Тышке Звенигово ден Волжский районласе мыскараче-влакым ӱжынна ыле. Саде кундемлаште мыскара шӱлышан еҥ-влак илат, шкештат тӱрлӧ оҥай номерым сценыште ончыкташ кумылан улыт.
Концертым Волжский район Корамас кундемысе «Чоткар тукым» ансамбль «Коллективем ом кудалте» муро дене почо. Ты коллективыш икмыняр вате коштеш. Нуно сценыш йыдалым чиен лектыч да яндар йӱкышт дене шергылтарен мурен пуышт. Варажым нине сӧрал вате-шамыч «Авамын эргыже» ден «Качым кычалына» сценке-влакым темлышт. Кокымшыжым «Морозко» руш калык йомак негызеш келыштарыме. Тудымак жюри ойырен нале. Варажым Йошкар-Олаште эртаралтше «Воштылаш, товатат, сулык огыл!» конкурс-фестивальыште «Качым кычалына» сценке икымше верым нале. Теат тидым, пагалыме лудшо-влак, сайын шарнеда дыр?