Шукерте огыл Российысе финн-угор калык-влакын ассоциацийышт «Герои финно-угорских народов России в годы Великой Отечественной войны 1941-1945 г.г.» книгам савыктен луктын.
Ассоциаций кодшо ийын тыгаяк лӱман конкурсым увертарен. Тушко Кугу Отечственный сарын 336 геройжо, тылын труженикше, сар годсо йоча-влак нерген 241 еҥ деч творческий паша толын. А ты книгашке 109 материалым вераҥдыме. Тылеч посна 152 Совет Ушем Герой да Чап орденын 25 кавалерже нерген кӱчык биографий пуалтеш.
Книгаште Марий кундемын 9 шочшыж нерген посна материал уло. Роҥго район (кызыт Советский) Руясола ялыште шочшо С.В.Албахтин нерген краевед Л.Н.Киртаевын статьяж гыч пален налына. Кужэҥер районышто шочшо-влак С.Ф.Букетовын, Н.Т.Маковын, Т.Ф.Петрован, Советский район Кукмарий гыч А.Н.Громовын, Морко район Унчо ял гыч М.И.Ильинын, Медведево район Цибикнур гыч И.С.Кудрявцевын, Шернур район Лапкапамаш ял гыч А.М.Яналовын сар корныштым радамлыме. Тыгак Курыкмарий район Пӹзӹкныр села гыч тылын труженикше Е.Н.Бычкова нерген ойлалтеш. Нине паша-влакым Л.Н.Киртаев, И.Букетова-Алвий, А.М.Курочкин, Г.Бычков, А.И.Глазырина возеныт. Нунылан призовой верым налмышт шотышто диплом да пӧлек шотеш книгам колтеныт.
Тылеч посна марий калыкын шочшыжо-влак коклаште Совет Ушем Герой-влакын биографийыштым ужына. Мо куандара: ты книгаште Марий Элыште, Удмуртийыште, Пошкырт кундемыште, Свердловск областьыште шочшо марий-влак нергенат статья-влак улыт. А ик вере – Башкортостанысе Мишкан район Ардаш ялын сар участникше Аптык Япанович Япанов нерген возымаште – «Ӱжара» газет гыч марла возымо заметкым фотографироватлен шындыме (345-ше лаштык).
Икманаш, 400 наре лаштыкан кӱжгӧ книгаште марий-влакын сарыште геройла кредалмышт нерген ятыр паша возалтын. Тау чолга автор-влаклан. Нине материал-влак историеш возалт кодыт да сар корным шымлаш полшат.
Эльвира Терентьева.