Кӱзем, кертам, виян лиям!

Кодшо шуматкечын Волжский кундемын ик эн сылне верыштыже, Руш Шайра ял воктенысе Мӱшылъер серыште кугу пайрем гӱжлыш. Тыште курык коклаште (кӱшкӧ да ӱлыкӧ) куржталмаш дене Волжский районын VIII чемпионатше да первенствыже эртаралтын. Тений тудо «Кугарня» газетын да Марий самырык театрын 30 ияш лӱмгечыштлан пӧлеклалтын. Ты кечынак спортсмен-влак курык коклаште куржталмаш дене Марий Эл Республикын кубокшо верч таҥасеныт, Россий Гран-Прин IX этапыштыже, Российыс ветеран-влак коклаште Гран-Прин VIII этапыштыже вийыштым тергеныт. Тылеч посна олаласе да районласе команде-влак эстафетыште куржталыныт.

Тений курык коклаште 175 еҥ куржын: 88 кугыеҥ да 87 йоча. Эн кӱчык дистанций – 1 км, эн кужу – 10 км. Сеҥыше-влакым 1, 4, 6 да 10 км дистанцийлаште ийгот дене шеледен палемденыт.

А.Ахтямов, С.Семёнов («Кугарня» газетын спецпризше дене палемдалтын), А.Максимов. 10 км дистанцийыште чыла пӧръеҥ коклаште сеҥыше-влак.

Мӱшыл курыкышто вийыштым спортсмен-влак веле огыл, кажне кумылан еҥ терген кертын. «Кугарня» газетын да самырык театрын пашаеҥышт ӧрдыжеш кодын огытыл, эн кӱчык дистанцийжым куржын онченыт. Пӧръеҥ-влак коклаште Марий самырык театрын актёржо Андрей Алексеев эн писын куржын толын, а ӱдыр-влак коклаште «Кугарня» газетын пашаеҥже Надежда Моисеева ончыл верыш лектын.

Курыкыш кӱзаш – манаш веле! Тиде моткоч неле ыле манын, спортсмен-влакат ойлышт. Туге гынат тӱҥжӧ сеҥымаш огыл, а шке вийым, пеҥгыдылыкым тергымаш.

Наталья Жаркова, Волжский район Шарача села, 6 км дистанцийыште  40-44 ияш-влак коклаште 2-шо верым налше:

– Тиде верыш икымше гана куржталаш толмем годым, курыкыш кӱзышемла, тышке тетла нигунам ом тол манын шоненам. Чот нелын чучын. Эсогыл дистанций гыч кораҥме нергенат шонкаленам. Но чытенам. А ындыжым уэш да уэш веле толмо шуэш. Шке деч шке йодам: «А ты гана кертам мо? Вием, чытышем ситат мо?» Мый шкемым тергаш йӧратем. Вес ганат тиде курыкыш вийым погаш, шке куатем пеҥгыдемдаш толам.



Александр Семёнов
, Морко, 10 километр дистанцийыште 35-39 ияш-влак коклаште 2-шо верым сеҥен налше:

– Тений игече пеш сай ыле, ӱмашсе гай огыл. Ӱмаште йӱр вошт куржталаш логалын. Ты гана еҥ-влакат шукын лийыныт. Ончышо еҥ шуко гын, куржталашат весела. Артист-влакын толмыштлан тау, концертышт кумылым нӧлтыш.

Нелылык нерген ойлаш гын, тудо кажне стартыште уло. Но, мыйын шонымаште, кажне спортсменын девизше – «Чыташ!». Кеч-мыняр неле лиеш гынат, пӱйым пурын чытыман. Мутат уке, тренировко деч посна курык коклаште куржталаш пеш йӧсӧ. Мый гын тиде стартлан ямдылалтынам, сандене куштылгырак ыле. Кок йырым куржаш йӧсырак ыле, вара кум йыржым шым шиж.

Такшым мый кум ий ончыч веле куржталаш туҥалынам, шканем цельым шынденам – Морко кундемыштем чапланаш, а варажым ала республикыштат… Шонымашем мыняр-гынат шукталтын, шонем.


Мыламат Мӱшыл курыкын кӱкшытшым, тудын туражым терген ончаш, пален налаш логале… Ой, уке, «логале» огыл, тидым шижын ончаш пиал шыргыжале! Вуй савырна, шӱм кӱлтка, шӱлыш петырна, а йол ончыко наҥгая. Шунан да тыгыде кӱан курык тайылым кӱзышыла, иктым умылет: теве тудо – кумда ӱмыргорнын ик йолгорныжо! Илышнажат коклан тиде Мӱшыл курык гаякыс! Уло виетым погалтен, чытен лектат да ончыко чымет гын, шонымашке шуат, у сеҥымашым сулет. Тыштат воктенет куржшо еҥ-влак кокланже кидыштым шуялтен кертыт, я «Кертат, кертат, ончыко!» манмышт дене куатым ешарат, шкалан ӱшанаш таратат. Тыште, курык коклаште, финишым кычалын веле от чыме, тыште илышыште виянрак, чытышырак да ушанрак лияш тунемат…

Утларак фотом тыште ончен кертыда.