Эртыше кечылаште «Педагогический дебют-2024» республикысе конкурсышто сеҥыше-влакын лӱмышт пале лийын. Марий Элысе 27 самырык туныктышо профессионал шинчымашыжым, моштымашыжым ты конкурсышто ончыктен.
«Самырык туныктышо» номинацийыште Волжск ола гыч Александр Сергеевич Николаев ойыртемалтын. Тудо 6-шо №-ан школышто математике ден физикым туныкта.
«Самырык класс вуйлатыше» номинацийыште Йошкар-Оласе А.С.Пушкин лӱмеш 4-ше №-ан гимназийыште англичан йылмым туныктышо Дарья Михайловна Иванова эн сай лийын.
«Дошкольный туныктымо организацийын самырык воспитательже» номинацийыште Йошкар-Оласе 52-шо №-ан «Колибри» йочасадыште педагог-психологлан тыршыше Валентина Федоровна Шуваева ойыртемалтын.
Конкурсын абсолютный сеҥыше лӱмым Йошкар-Оласе А.С.Пушкин лӱмеш 4-ше №-ан гимназийыште математикым туныктышо Надежда Николаевна Лебедева сулен.
Конкурсын лауреатше-влаклан Марий Элысе Образований да науко министерстве деч окса премийым кучыктеныт.
Марий Элысе Образований да науко министерствын VK-се тӱшка гыч налме фото.