Шернур район Кукнур села воктенысе чодыра аланыште верланыше Йӱштӧ Кугызан илемыштыже У ий шӱлыш озаланаш тӱҥалын. Тушто тений юзо шӱлышан пашам шукташ – Лумӱдырын рольжым модаш – Кукнур тӱвыра пӧртыштӧ тыршыше Марина Конаковалан ӱшаныме.
Кызыт тудо «Пеледыш» фольклор ансамбльын хормейстерже. Калык лӱмым сулышо коллективыш 17 еҥ коштеш. Марий ӱдыр шкежат тушто мура да кушта. Тылеч посна кугыеҥ-влакым сольно мураш туныктышо «Шонанпыл» кружокым вӱда.
Шернур район Лари (Эшполдин) ялеш шочын-кушшо Марина изиж годсек коваж дене пырля руашым нӧштылаш йӧратен. Сандене коважын темлымыж почешак Йошкар-Оласе торгово-технологический колледжыш повар-кондитерлан тунем лектын. А вара вучыдымын тӱвыра аланышке логалын. Лачак идалык ончыч Кукнур тӱвыра пӧртыштӧ хормейстер кӱлын. Ты пашам шукташ Марина келшен.
Йӱштӧ Кугызан илемже (эше тудым резиденций маныт) 1 декабрьыште почылтын. Лач ты кечын Марина Лумӱдырын сӧрал вургемжым икымше гана чиен лектын да йомак тӱняш логалмыжлак чучын. Йӱштӧ Кочай дене пырля уна-влакым вашлийын, нунылан поро тыланымашым ойлат. А экскурсийыш толшо-влак нуным сылне почеламутла дене куандарат.
Кажне кечын поро кумыл да волгалтше чуриян еҥ-шамыч дене мутланымаш, веселитлымаш Лумӱдырлан вий-куатым ешаренак шога. Маринан У ий нерген шонымашыжым пален налаш оҥай ыле. Тудо тыгерак каласыш:
– Мыланем изиэм годсек У ий пайремлан ямдылалтме пагыт келша. Мотор тувырым ойырен налат да вара тудым уло кумылын чиет. Ме ешыште кок ӱдыр кушкынна. Кум ийлан кугурак акам уло. Сандене коктын юзо пайрем нерген шонкаленна, пӧлекым вученна.
У ий пайремлан уло ешна иктеш погына. Ешыштына сай йӱла уло: чодыра гыч кожым конден, чыланат пырля тудым сӧрастарена. У ий – илышысе у лаштык семын почылтшо пагыт. Тудо эртен кайыме дене шеҥгеке ончал савырнена да, йоҥылышым ыштенна гын, тудым тӧрлаташ корным кычалына. Вет у идалыкыште чылажымат вашталтен кертына. Сандене у, 2025-ше идалыкыш, мый вончаш ямде улам.
Тыгак У ий кастене ешемым йӧратыме кочкышна дене куандарем. Ме кажне гана «Оливье» салатым ямдылена. Когыльымат кӱэштына, шонем. Мый яра жапыште пареҥге, тыгак рис да муно дене когыльым ышташ йӧратем.
Мутланымаш тыгай иктешлымашым ышташ таратыш: ты Лумӱдыр озыркан мардеж дечат огеш лӱд, сандене тудын чылажат шотеш толшаш.
Эльвира Терентьева.