Кӱсынан еҥын погыжым южгунам поген налыт. Тудым вара кузе ужалат?
Т.Смирнова.
У Торъял район.
Суд пристав-влак федеральный службын Марий Элысе управленийже умылтара:
– Кӱсынан еҥ исполнительный документ почеш парымжым огеш тӱлӧ гын, тудын погыжым арестоватлат. Шукыж годым суд пристав-влак деке бытовой технике, автотранспорт да кусараш лийдыме пого (пачер, пӧрт) логалыт.
Кӱсынан еҥ, арестоватлыме погыжлан акым пуымо шотышто извещений лекмеке, лу кече жапыште палемдыме погым шке ужалаш ходатайствым возен кертеш. Но погыжын акше 30 тӱжем деч шерге огыл лийшаш. Тыгай ходатайствым ок пу але взыскатель арестоватлыме погым кӱсыным петырыме олмеш налаш тореш лиеш гын, погым ужалыше организацийлан ужалымашке лукташ пуат.
Арестоватлыме погым ужалаш «Росимущество» федеральный агентствын территориальный управленийжын гына праваже уло. Марий Элыште тудын ӱшанле организацийжылан «Недвижимость Плюс» ООО шотлалтеш.
Арестоватлыме погым кок йӧн дене ужалат: комиссионый кевыт семын – ужалыше да налше коклаште. Але торгым эртарат – кӧ специализироватлыме организацийлан шукырак акым темла. Торгышко 500 тӱжем теҥге деч шергырак пого логалеш.
Арестоватлыме пого спискым компанийын сайтыштыже (http://www.nedviplus.ru) муаш, туштак тичмаш уверым пален налаш лиеш.
Кусараш лийдыме погым, илыме пӧртым, гаражым, мланде участкым ужалыме шотышто торгым республикысе олалаште да районлаште эртарат. Тушко физический, юридический лица-влакымат пуртат. Тӱҥжӧ – документ-влакым чын да жапыштыже оформитлаш. Тыгак задаткым тӱлыман.
Публичный торг-влакым эртарыме нерген уверым официальный сайтыште (http://torgi.gov.ru), тыгак Суд пристав-влак федеральный службын интернет-порталыштыже да Росимуществын сайтыштыже пален налаш лиеш.
2021 ийыште Марий Элыште кӱсынан еҥ-влакын арестоватлыме погыштым 87,7 миллион теҥгелан ужалыме. Ыштен налме оксам кӱсыным петыраш взыскатель-влаклан колтымо.
Фотом интернет гыч налме.