Ӱмаште элна мучко эссе конкурс эртаралтын. Тушко 52 регион гыч 2800 икшыве ушнен, финалыш 54 тунемше лектын. Марий Эл гыч Звенигово район Кужмарий школышто 9-ше классыште тунемше Милана Садовникова шкетын икымше верым налын. 27-28 январьыште тудо Москошко финалыш миен коштын, шергакан пӧлек дене палемдалтын, ВДНХ-се павильонлаште экскурсий дене коштын.
Марий Эл гыч икымше
Тиде конкурсыш Марий Эл гыч шуко тунемше ушнен, но Милана Садовникован пашаже жюри-влаклан поснак келшен. Тудо лывырге йылмыж дене историйым сайын почын пуымыж дене ӧрыктарен. Ончыл верыш лекмыж дене Марий кундемын, тыгак шочмо Кужмарий школжын чапшым кӱшкӧ нӧлтен. Тиде сеҥымашыш шуаш Кужмарий школышто историйым туныктышо Вера Витальевна Семёнова кугу надырым пыштен: ӱдырым историйлан кумылаҥден да келге шинчымашым пуэн. Москошко нуно коктын миен коштыныт.
– Тидым ик эн кугу сеҥымаш семын ужам. Тышке ушнаш историйым туныктышо Вера Витальевна Семёнова таратен. Эссе финанс теме дене кылдалтын, биржым, тудын историйжым почын пуаш кӱлын. Тидлан сайын ямдылалтынам, бирже темым шымлен лектынам, посна книгам лудынам. Сочиненийым возаш куштылго огыл ыле. Поснак историйым сайын палыман, умылтарен моштыман, датым чын ончыктыман. Сочиненийым Москошко шыжым тергаш колтенна. 5 январьыште сеҥышыш лекмем нерген мыланна увертареныт. Тидлан моткоч куаненам.
Москошто ВДНХ-се ончерыште пеш чот келшен. Мутлан, космонавтике да авиаций павильоным палемдаш лиеш.
Сеҥышыш лекмемлан мыланем дипломым, шӧртньӧ кубокым, книгам да эше икмыняр пӧлекым кучыктеныт, – мане М.Садовникова.
Сайын тунемеш, кӱслем шокта
Милана кок шочшан ешыште шочын-кушкын. Ачаже Озаҥыште чоҥышылан ышта, аваже – «Звениговский» совхозышто. Никита изаже Йошкар-Олаште шинчымашым налеш.
Милана школышто сайын тунемеш, тӱрлӧ олимпиадыш кумылын ушна. Поснак математике, историй тудлан келша. Тыгак кӱслем сайын шокта, сылнын мура. Ӱмаште Кужмарий йоча сымыктыш школым тунем пытарен. Ондак эше хорышто мурен.
– Мый 3-шо класс гыч кӱслем шокташ тӱҥалынам. «Йоҥгалтыш» кӱслезе ансамбль дене тӱрлӧ конкурсыш коштынна. Москоштат кум гана лийынна. Коллективым Валентина Витальевна Костерова вуйлата. Тыгак эше фортепьяно дене моштем, – каласыш тудо.
Историйым сайын палаш да тыгодым чыла тидым лывырге йылме дене возен мошташ – кугу мастарлык. Милана Садовникован чыла тидыже уло. Но илыш корныжым тӱвыра паша дене кылдынеже. 9-ше класс деч вара И.С.Палантай лӱмеш тӱвыра да сымыктыш колледжыш тунемаш пураш шона. Ӱдырын шонымашыже шукталтеш да сеҥымашыжат эше ятыр лиеш манын ӱшанена.