Марий Эл Республиклан 100 ий темме вашеш редакцийна лудшо-влаклан пӧлекым – видеоклипым – ямдылен ыле. Тушто «Чинчывий» ансамбльын кӱслезыже-влак сылне сем-влакым шоктышт. Нунын кокла гыч иктыже – тачысе геройна.
Анастасия Токарева Оршанке район Кугу Кугланур ялыште шочын-кушкын. Республикысе президент интернат-школышто шинчымашым поген. Тушто кӱсле дене шокташ тунемын. Тунамак ӱдыр илышыжым тӱвыра дене кылдаш шонен пыштен. Кызыт Настя И.Палантай лӱмеш тӱвыра да сымыктыш колледжыште нылымше курсышто тунемеш.
– Ты школыш мыйым ковам Людмила Семёновна тунемаш наҥгаен. Шке жапыштыже тудо ялысе школышто туныктен, директор лийын. Ковам шкеже баян дене мастарын шокта. Мыйым изи годсек мураш туныктен. Икымше класс гычак «Кӱсле» ансамбльыш коштынам. Коллективна тӱрлӧ конкурсышто мастарлыкым ончыктен, Озаҥ, Чебоксар, Петрозаводск, Санкт-Петербург олалаш миенна. Тыгак Анапысе да Сочисе санаторийлаште коллектив дене каненна. Тылеч посна йоча хор дене Москосо Кремль полатыште эртаралтше «Детский хор России» мероприятийыш миенна, – каласкалыш Настя.
Анастасия – ончыкылык туныктышо, «Артист, преподаватель концертмейстер» специальность дене шинчымашым пога. Тунемме деч вара А.Токарева «Чинчывий» да «Памаш шинча» калык семӱзгар ансамбльлашке коштеш. Каныш кечын колледжыште репетицийыште жапым эртара. Тыгак конкурслаште, фестивальлаште, концертлаште вийжым терга.
Умбакыже 4-ше декабрьыште лекше номерыште лудса. Тыгак электрон весийым онлайн-кевытыште налын кертыда.