Тудо самырык да чолга. Шкаланже цельым шындыше да шонымашке шуаш чыла ышташ тыршыше. Эрдене кынелын, йӧратыме пашашкыже вашка – «Марий кундем» кугыжаныш калык семӱзгар ансамбльын ик эн самырык еҥже. А вара И.С.Палантай лӱмеш тӱвыра да сымыктыш колледжыш куржеш – тушто кумшо курсышто тунемеш. Ты чулым марий ӱдырын лӱмжӧ – Вероника Соколова.
У Торъял гыч – Йошкар-Олаш
Ӱдыр – У Торъял район Тушнур ял гыч. Икымше классыш У Торъял посёлкысо школыш каен. Тунамак посёлкысо Э.Н.Сапаев лӱмеш йоча сымыктыш школыш кошташ тӱҥалын. Ончыч кушташ тунемын, а вара, моло ӱдыр-рвезын тӱрлӧ семӱзгар дене шоктымыштым ужын, шкенжынат нунын дек ушнаш кумылжо лектын. Конкурсым эртымеке, Вероникам фортепиано дене шокташ налыныт. Туныктышо-влак ӱдырын мастарлыкшым шекланеныт да Йошкар-Олаш президентский школ-интернатыш (кызыт Национальный сымыктыш гимназий) каяш темленыт.
– Ача-авам мыйым Йошкар-Олаш тунемаш пураш конденыт. Конкурс кугу ыле, тургыжланенам, лӱдынам. Гимназийыште туныктышо Елизавета Ивановна Васютина мыйым кӱсле классыш налын. 2-шо класс гыч тӱшкагудышто илаш тӱҥалынам. Неле ыле, мӧҥгӧ шупшын, но мый писын тунем шуынам. Каныш кечылан ача-авам налаш толыт ыле, – каласкала В.Соколова.
Гимназий деч вара ӱдыр Палантай лӱмеш тӱвыра да сымыктыш колледжыш тунемаш пурен, музыковед лияш ямдылалтеш. Моло дене таҥастарымаште ты специальность ик эн нелылан шотлалтеш. Шуко лудман, тунемман. Но студенткым нелылык нимынярат ок чактаре.
Оркестрыште – кӱслезе
Студент лиймекыже, кӱсле дене шоктымыжо ӧрдыжеш кодеш манын, Вероника ойгырен. Но, пиалешыже, «Марий кундем» ансамбльым вуйлатыше А.В.Волков колледжыш толын да оркестрыште кӱслезылан ӱжын.
– Гимназийыште кӱсле дене шокташ тунемынна. А оркестрыш Моско гыч у семӱзгарым конденыт ыле. Тудо изиш ойыртемалтше, тыгай дене утларак произведений семым лукташ лиеш. У кӱсле дене шокташ пел ий наре тунемынам. Ынде кум ий ты коллектив дене пырля пашам ыштем. Кажне кечын эрдене репетицийыш коштам. Ансамбль дене пырля ятыр вере лияш йӧн лектеш. Икымше ийынак Татарстанысе Набережный Челна олаш фестивальыш ушненна. Ульяновскыштат лийынам. Ӱмаште декабрьыште Москош ВДНХ-ш «Россий» тӱнямбал ончер-форумыш миен коштынна. Тушто Марий Элын кечыжлан пӧлеклалтше кугу концерт лийын. «Марий Эл» ансамбль мемнан шоктымо сем почеш куштен. Театр-влак дене кылым кучена, артист-шамычын выступатлымышт годым семым келыштаренна, – палдара кӱслезе.
Кызыт Вероника фортепиано, кӱсле дене шокта, тыгак балалайке дене мошта. 9-ше классыште тунеммыж годым ача-аваже шочмо кечыжлан гитарым пӧлекленыт – ты семӱзгарым шокташ шке гыч тунемын. Эше укулелем налын, тудын денат мотор семым луктеш. Жапем лиеш гын, скрипкам шокташ тунемаш кумыл уло манын палемдыш ӱдыр.
Тыршен тунеммылан – вуйлатышын стипендийжым
Тунемме деч вара студентке тӱшкагудыш кастене индеш шагат лишан гына толын пура. Кочкаш ямдыла да адак учебникым кучен шинчеш.
– Мый академический профессиональный музыкылан тунемам. Южгунам йӱдымат программым тунем шинчем, – манеш мастар ӱдыр.
Колледжыште икымше курс гычак В.Соколова шкенжым чолга студентке семын ончыктен: тӱрлӧ мероприятийыш ушна, конкурслаште ончыл верыш лектеш, вӱдышӧ семынат тудым чӱчкыдын ӱжыт – кеч марла, кеч рушла.
Тыршымыжлан кӧра колледжын советше Вероника Соколован кандидатурыжым Марий Элым Вуйлатышын стипендиатше лияш темлен. А тиде ӱдырым эшеат у сеҥымашыш шуаш кумылаҥда.
Вероникан лишыл жаплан палемдыме ик кугу цельже – колледжым тунем лекташ да иктаж кугу олаш консерваторийыш тунемаш пураш, кӱшыл шинчымашым налаш. Ойырен налме корно келша гын, ӧрканыман огыл, эре тыршыман, а тиде кугу кӱкшытыш шуаш ӱшаным пуа, палемдыш ӱдыр.
В.Соколован альбомжо гыч налме фото.