Кодшо кечылаште Марий Элышке Россий просвещений министр С.Кравцов ден Россий Президентын Юл кундем федеральный округысо полномочный представительже И.Комаров толын коштыныт. С.Кравцов Юл кундем федеральный округысо образований системым вияҥдымылан пӧлеклалтше совещанийым эртарен. Тушко Марий Элым Вуйлатыше Ю.Зайцев, Федераций Совет Председательын алмаштышыже К.Косачев да Юл кундемысе чыла регион гыч представитель-влак ушненыт.
С.Кравцовын палемдымыж почеш, Марий Эл Республик да пӱтынь Юл кундем Россий Президентын чыла кӱштымыжым жапыштыже шуктат.
– Тыгай вашлиймаш-влакым эртараш манын, Федераций Совет Председатель Валентина Ивановна Матвиенко дене кутырен келшыме. Тыге ме федеральный округышто тачысе жаплан келшыше йодыш-влакым каҥашен кертына. «Образований» нацпроект илышыш шыҥдаралтеш. Чыла паша жапыштыже шукталтеш. Тиде ик эн тӱҥ. Вет еҥ-шамыч чоҥымо, ачалыме деч вара школ-влакын почылтмыштым вучат. Тыгак интернетыште шарлыше уда информаций деч йоча-влакым аралыме да нуным воспитатлыме шотышто каҥашыман, – манын С.Кравцов.
В.Путинын палемдымыж почеш, образований системым вияҥден колтымаште ик эн тӱҥ цель – йоча да самырык еҥ-влакын талантыштым, мастарлыкыштым шуарыме да нунылан полшымо сай системым ышташ. Тидын нерген совещанийыште И.Комаров ойлен.
И.Комаров оборонно-промышленный комплекслан кадрым ямдылыме нерген палемден коден.