Марий Элым вуйлатыше Александр Евстифеев «РЖД» ОАО-н Горький кӱртньыгорно филиалжым вуйлатыше Сергей Дорофеевский дене вашлийын.
Нуно республикысе транспортын кылжым Российын вес регионлаже дене вияҥдыме, пассажирым да грузым шупшыктымо годым лӱдыкшым кораҥдыме нерген каҥашеныт. Марий Элым вуйлатыше электрификаций да Зеленый Дол – Яраҥ кӱртньыгорно ужашым Котельнич станций марте (Киров область) шуяш кӱлмӧ нерген ойлен.
Транспорт шотышто лӱдыкшым кораҥдаш да ӧрдыж еҥым пурташ огыл манын, С.Дорофеевский кӱртньыгорно вокзал йыр 3D печым чоҥымо шотышто каласен.
Вашлиймаште тыгак кӱртньыгорно вокзалын фасадшым уэмдыме нерген мутым лукмо, вет ты объект регионысо значениян архитектур памятниклан шотлалтеш.