Кӱлыт: 3 муно, 0,5 л. шӧр, 300 г ложаш, ик чывыштыш кочмо содо, 1 изи совла шинчал, 1-3 кугу совла сакырложаш, 150-200 мл шолтымо вӱд, 50 мл нӧшмӱй.
Кӧргылан: пел кило чыве фарш, 4-5 шоган, шинчал, йоҥыштымо шем пурыс, свежа але коштымо укроп, нӧшмӱй.
Келге мискыш шӧрым, муным, шинчалым да сакырым пыштыза, сайын варыза. Ложашым изин-изин ешарен, умбакыже лугыза. Шолшо вӱдышкӧ содым пыштыза, писын лугалтыза да руашыш опталза. Руашым 15 минутлан кораҥдыза. Мелнам ыштыме деч ончыч нӧшмӱйым ешарыза.
Шоганым, тыгыдын пӱчкеден, ырыктыме нӧшмӱеш жаритлыза, вара тушко фаршым ешарыза. Кугу тулеш 3-4 минут кучыза, вара изи тулеш кӱмешкыже шинчыктыза, шинчалым, пурысым да укропым ешарыза.
Ырыктыме салмаш мелнам кӱктыза. Икымше мелнам кӱэштме деч ончыч салмаш нӧшмӱйым йыгыза, варажым тудым кучылтдеат лиеш.
Мелна покшеке ик кугу совла фаршым пыштыза. Мелнам пӱтыралза але конверт семын тодылза.