Тиде историйым Татьяна ковам каласкален. Ковамын Лида лӱман йолташ ӱдыржӧ лийын. Нуно йочашт годсек келшеныт, ик парт коклаште шинченыт, школ деч вара ик университетыште тунемыныт, дипломым налмеке, ик вере пашаш пуреныт.
Лидан илышыже пиаланжак лийын огыл: кок гана марлан каен, но кок пелашыжат ойырлен каен. А ковам кочам дене ваш умылен иленыт, нунын ӱдырышт шочын.
Сӱан кечышт лӱмеш пайремлан (индеш ий пырля иленыт) коча-ковам изирак пайремым ыштеныт. Родыштым, йолташыштым ӱжыныт, нунын коклаште Лида лийын. Саламлыме годым тудо ятыр поро шомакым ойлен, эре шыргыжын да пӧлек шотеш мужыр кӱпчыкым пуэн. Тыгайжым тудо жапыште налаш пеш неле улмаш, кевытлаште ужален огытыл.
Пӧлек ковамлан пеш келшен, тудо тоштыжым шкафыш поген пыштен да кочам дене чапле у кӱпчыкыштӧ малаш тӱҥалыныт.
Ик кечын ковам паша гыч толын пурен, онча – малыме пӧлемыште тул йӱла. Эрдене йӧрташ мондымо манын шоналтен, тулым йӧртен. Кухньышто кочкаш шолтымыж годым колеш, пуйто кроватьыште йоча тӧрштылеш. Но мӧҥгыштӧ иктат лийын огыл. Пелашыж ден икшывыже уремыште коштыныт. Пӧлемыш миен – тушто иктат уке, а койкысо леведыш туржалтын, пуйто тушто чынжымак ала-кӧ тӧрштылын.
Тылеч вара тылзе наре эртен, тиде ӧрыктарыше случай нерген мондашат тӱҥалыныт. Но кочамын койыш-шоктышыжо вашталтын. Тудо торжарак лийын, к сырен. Тазалыкшат начарештын. Врач-влак дек тергалташ коштын, но нуно «Нимом ыштен огына керт, медицине могырым тендан чыла сай» манын каласеныт. Варажым кочам эре киен гына, кошташ вийжат кодын огыл.
Ик йӱдым ковамлан омо кончен. Пуйто тудо кроватьыште мален кия, а кӱпчык гыч шӱргышкыжӧ шукш-влак нушкын кӱзат да шинчаш, нерыш, пылышыш пурат. Лӱдмыж дене ковам помыжалт каен, кӱпчыкыш ончалын да тунамак тогдаен. Вашкӱзым налын да кӱпчыкшӱргым пӱчкын. Пун коклаште ыресым сӱретлыман шем лапчыкым да коштымо чыве йолым муын. Шуко шонкалыде, кок кӱпчыкге кудывечыш луктын йӱлалтен.
Икмыняр жап гыч кочам паремаш тӱҥалын, вурседылмымат чарнен. А Лида йолташыже нунын дек толмым чарнен.
Инна.
Советский район.
Интернет гыч налме фото.