
1 апрельыште Йошкар-Олаште Ленин лӱмеш тӱвыра полатыште «Воштылаш, товатат, сулык огыл!» конкурс эртыш, мыскараче-влак кум шагат утла калыкым воштылтышт.
Морко район Тат-Чодыраял тӱвыра пӧрт гыч толшо Айсылу Хамидуллина, Фирдания Хамидуллина, Альфия Гарапшина «Доктыр дене приёмышто» сценке дене икымше верыш лектын. Вуйлатышышт – Динарт Хамидуллин. Тидлан конкурсын организаторжо, «Кугарня» газет редакций, 5000 теҥгеаш премийым кучыктен. Тӱҥ премийлан оксам «Куженерский» ООО (вуйлатыше — Н.А.Поликарпов) ойырен.
Кокымшо верым кок сценкылан пуымо. Тиде – У Торъял районын чапшым аралыше Адам Мамаев ден Игорь Попов. Нуно, мыскарам ойлен, такмак-влакым шергылтареныт. Нунылан «Амарис» фирме деч 6 тӱжем теҥгеаш сертификатым кучыктенна.
А Морко калык театрын артистше-влак «Поссовет председательын приёмныйыштыжо» сценке дене куандарышт. Нуно чыла шомакым «П» буква дене оҥайын гына келыштареныт. Ты театрым вуйлатыше – Анна Якушева. 3 тӱжем теҥгеаш премий пуалтын.
Кумшо верым жюри Советский район Кужмарий гыч Валентина Ефремова ден Вера Мочаева «Семон кайыш» сценкылан пуэн. Артист-влаклан кок тӱжем теҥгеаш премий палемдалтын.
Посна приз дене Волжский район Сотнур гыч толшо артист-влак налыныт: «Ялысе томаша» сценкым Радик Яндаков, Юрий Дмитриев, Вера Акпатырева, Валентина Печникова устан модын ончыктеныт. Нунылан кидмастар В.Н Кудрявцев деч пӧлекым кучыктымо.
«Мыскараче мурызо» конкурсышто Медведево район Нужъял гыч «Ошла сем» ансамбльын участникше-влак Олег Васильев, Николай Васильев, Юрий Никитин, баян дене ‒ Родион Алексеев сеҥеныт. Сеҥыше-влакым саламлена да чыла участник-влаклан тауштена. Те чынжымак мотор весела касым пӧлеклышда. Вес ганат конкурсышкына ушнеда манын ӱшанена.
Эльвира Терентьева.
И.Речкинын фотожо-влак.