Тиде фото «Кугарня» газетын икымше лаштыкыштыже 1992 ий 10 июльышто лектын. Фотом А.Щербаков ыштен. Кӧмыт вара улыт тиде фотошто? Пагалыме лудшына-влак, ала шкендам, иктаж палымыдам ужда? Возен колтыза.
А газет комышто возымо: «Ӱмаште ты йоча-влак ик идалыклан изирак лийыныт. Тунам нуно «Кугарня» нерген колынат огытыл, а теве ынде пӱнчӧ киш пушан пурам кушкыжын, тымарте уждымо газетым пешак шымлат. Келша мо тудо тыланда? «Кугарнян» лишыл йолташыже лийын сеҥеда мо? Ала тыланда шочмо йылме дене лекше газетше ынде огешат кӱл? Умыледа мо, нӧргӧ-влак, вет эше ик марла газет, книга, журнал лекме дене ме марий улмынам келгынрак умылаш, шкенам утларак пагалаш тӱҥалына.
Ойлат: «Молан эше ик марла газетше кӱлеш? Уло «Марий Эл», сита веле…» А молан марий вате ик йоча дене гына огеш серлаге? Эше иктаж ныл-вич йочам ышташ тырша. Эргат лийже, ӱдырат. Кузе уке гын. Ик йоча дене илашат йокрокрак, ӱмырат каньыле огыл. Юмо тӱрлым да шукым йӧрата. Садлан газетшат марийын тӱрлӧ лийже…»
П а г а л ы м е лудшына-влак. Тений «Кугарня» газет лекташ тӱҥалмылан 30 ий темеш. Мемнан пеленна улмыланда пеш кугу тау. Тендан шонымашдам палымына шуэш: газетыште мо келша да мо огеш келше? Садлан анкетым савыктена. Тусо йодыш-влаклан вашештыза, пӱчкын лукса да редакцийышкына колтыза. (Анкетым 26 февральысе номерыште савыктыме). Анкетым колтышо-влак коклаште лотерей модышым эртарена, кум еҥлан пӧлек логалеш. 1 апрель вашеш иктешлена.
