Украиныште специальный военный операцийым шуктышо-влаклан кундемыштына тӱрлӧ семын полшаш тыршат. Шернур районысо тӱвыра пӧртын пашаеҥже-влак, салтак-влаклан окса дене полшаш манын, яллаште поро кумылым ончыктымо концертым эртарат.
Ӱмаште 14 октябрь гыч концерт-влак дене яллашке лектын кошташ тӱҥалыныт. Ыштен налме оксам специальный военный операцийыште улшо-влаклан Украиныш колтеныт.
– Ме районысо чыла яллашке миен шуынна. Концерт годым Чылдемыр ял шотан илемыш пурышо Нольыкмарий ялысе ветеран-влакын ушемыштым вуйлатыше Анастасия Ивановна Глазырина, тыгак Казанский селасе ветеран-влакын ушемыштым вуйлатыше Римма Владимировна Романова оксам пуэныт.
Шуко концертым шыжым ончыктымо. Тений шошым Лари ден Тамшэҥер яллашке миен коштынна. Шошым паша шуко, еҥ-влакым концертлаш погаш йӧсӧ. Сандене ты гана калык шагал погынен ыле. Кызыт ме ты пашам жаплан чаренна.
Концерт программышке 25-26 номерым пуртенна. Нуно сар теме дене кылдалтше, патриотический шӱлышан улыт. Концертлашке Шернур посёлкысо 1-ше №-ан школын коллективше, посёлкысо «Любава» да моло ансамбль ушненыт.
Тыгай пашам шуктымаште ялысе тӱвыра пӧртын пашаеҥже-влаклан чот тыршаш логалын.
Концертым эртарыме дене чылаже 100 тӱжем теҥгем погенна да благотворительный фондыш пуэнна, – мане Шернур районысо тӱвыра да каныме пӧртым вуйлатыше Елена Леонидовна Конакова.
Шернур районысо тӱвыра да каныме пӧртын аккомпаниаторжо, марий мурызо Саша Иванов (фотошто шола гыч икымше) тыгай концертлашке эре ушна. Тидын шотышто тудо тыгерак мане:
– Тений кок концертым гына эртарен шуктымо. Вес кугу мероприятий-влаклан ямдылалташ тӱҥалмылан кӧра чарныме.
Тыгай концертыш калык кумылын коштын. Мемнан салтакна-влаклан кеч тыгай йӧн дене изирак полышым, шӱкалтышым ыштат манын умылат да палат. Залыште илалше-влакымат шуко ужаш лийын. Концертым «Служить России» муро дене мучашленна.
Тӱвыра пашаеҥ-влакын СВО-што улшо-влаклан тыге полшен шогымыштлан таум гына ойлыман.