Вес тунемме идалыкыште (2024-2025 ийлаште) ссузлаште тунемше ӱдыр-рвезе-влак Россий Правительствын стипендийжым налын кертыт.
Тидын шотышто Марий Элысе Образований да науко министерствын эксперт комиссийже претендент-влакым ойыраш тӱҥалеш. Тыгай стипендийым налаш манын, студент-влаклан «4» да «5» гына тунемман, тыгак регионысо, российысе, тӱнямбалысе олимпиадылашке, профессионал мастарлык дене кылдалтше конкурслашке ушныман, тунемме организацийлаште экспериментальный пашам шуктыман.
Россий Правительствын стипендийжым налаш 13 тунемме учреждений гыч йодмаш пурен. Сеҥышыш лекше-влаклан кажне тылзын 4 тӱжем теҥгем тӱлаш тӱҥалыт.