27-29 августышто Владимир областьыште ушкалым аппарат дене лӱштышӧ оператор-влак коклаште Всероссийский конкурс 29-ше гана эртаралтын.
Тушко элнан 50 регионжо гыч специалист-влак ушненыт. Марий Элысе ялозанлык пашаеҥ-шамычат ты конкурсышто лийыныт.
Ушкалым аппарат дене лӱштышӧ оператор-шамычлан ныл йыжыҥым эрташ кӱлын. Эн ончыч теорийым палымыштым тергеныт. Вара лӱштымӧ пашалан санитарно ямде улмыштым ончыктеныт. Тыгак аппаратым писын да чын поген моштымышт шотышто палдареныт да лӱштымӧ залыште мастарлыкыштым тергеныт.
Сеҥыше-влакым вич тӱрлӧ номинацийыште ойыреныт. Кажныштыже кум призёрым палемденыт. Тылеч посна чыла участник коклаште эн шуко баллым погышылан чемпион лӱмым пуэныт. Марий Элысе У Торъял район «Первый Май» озанлыкын аппарат дене лӱштышӧ операторжо Надежда Гороховам ты мероприятийыште Российысе Ялозанлык министерствын чап грамотшо дене палемденыт.
Марий Элысе Ялозанлык министерствын ВК-се сайтше гыч налме фото.