«Ял але ола – пешыже ойыркалымаш уке, вет палем: кеч-кушто илем гынат, шкаланем пашам садак муам», – манеш Диана Липатникова. Кызыт самырык еҥ Морко район шочмо Унчо селаштыже ила да чонжылан келшыше сомылым шукта.
Тыге туныктеныт
Нимо ончылно чакнен ок шогал, нимогай паша деч ок лӱд – теве тыгай Диана. Ялыште шочын-кушшо, изинек пашалан тунемше еҥын вес семынже огешат лий. А Геннадий Архимонович ден Татьяна Алексеевна ӱдырыштым да кок эргыштым шке примерышт дене йӧратен, ваш пагален, умылен илаш туныктеныт.
– Чаманен каласыман, 2017 ийыште ачанан ӱмыржӧ кӱрылтын. Тудо кидмастар лийын, могай пашалан пижын – чыла ыштен мошта ыле. Кӱртньӧ тудын кидыштыже мотор узорыш савырнен, чоҥымо пашаштат тале лийын. Авамын кидыштыже куэм мотор тувыр але марий костюмыш савырна. Тудо шуко еҥлан урга. Ынде кугу суртым шкет куча, вольыкым онча, пакчаже поян саска дене куандара. Шольым-влак дене тудлан эре полшаш тыршена, – ойла Д.Липатникова.
Эре мотор лийме шуэш
Школ деч вара ӱдыр Озаҥ оласе техникумым йошкар диплом дене тунем лектын, экономике да бухучёт направленийым ойырен налын. Студенткылан эн чот менеджмент да маркетинг теме-влак келшеныт. Техникумышто налме шинчымашыже кызыт тудлан лач кӱлеш лийын.
Студентше годымак Дианан ӱдыр-ӱдырамаш-влаклан мотор кӱчым ышташ кумылжо лектын. Курсым эртымеке да мо кӱлешым наледымеке, ончыч шкаланже, аваже, ака-кокаже-шамычлан моторлыкым пӧлеклен. Варарак ӱдырын мастарлыкше нерген шукырак еҥ пален налын да маникюрым ыштен пуаш йодын. Кӧ Диана дек толын ок керт, мутлан, изи йочам нигӧ дене кодаш, туддек ӱдыр шке мия.
– Ончыч шке автомашинам лийын огыл. Икмыняр жап гыч кредитым налынам да шке транспорт дене кудалышташ тӱҥалынам. Тидыже илышем ятырлан куштылемда, жапым аныклаш полша. Кызыт клиентем ятыр, села гыч веле огыл, пошкудо ялла гычат толыт. Ынде кандаш ий ты сомылем кажне гана йӧратен, чоным пыштен ыштем. Эре тунемам, моштымашем кушкеш, садланак мыланем ӱшанат, шонем, – каласкала тудо.
Куаным пӧлекла
Икана 8 Март пайрем лишан, аважлан тюльпан аршашым налаш шонен, Диана селасе кевытыш миен. Но тушто пеледышым налын пытареныт улмаш. Кумылжо волен. Тюльпаным налде кодшо шкетын гына омыл дыр манын шоналтен тунам тудо. Тылеч вара самырык еҥын вуйыштыжо ик кугу шонымаш пӧрдаш тӱҥалын. Да ныл ий ончыч тудо шукталтын. Диана, оксам поген, 8 Март пайрем деч ончыч пеледыш базе гыч 500 тюльпаным Унчыш налын конден. Куанен да тыгодымак кӧргыштыжӧ тургыжланен, кузе гын тынар пеледышым ужален пытараш манын шонен.
– Тидын нерген ятыр еҥым палдараш манын, видеороликым сниматленам. Селаштына шукын тораш пашам ышташ кудалыштыт, садлан пайремлан лишыл еҥыштым шке толын саламлаш йӧнышт уке. А мый тыгай йӧным темленам. Авашт але пелашышт дек миен, йӧратыме еҥышт деч саламлымашан мотор пеледыш аршашым кучыктем. Кажне тыгай татым видеош войзен, интернетыш вераҥдем. Пеш шуко еҥ деч тауштымашан серыш-влак толыныт. Тидыже моткоч шерге. Садланак кажне ийын ӱдыр-ӱдырамаш-влакым куандарем, ты сай пашам кудалташ ом шоно, – манеш Д.Липатникова.
Тюльпан-влак гыч веле огыл, моло пеледыш гычат самырык еҥ кугу аршаш-влакым пога. Тидланже лӱмын курсым тунем лектын. Тыгай аршашымат шукын йыҥгыртен йодыт.
Маска, Мераҥ…
Унчо – кугу села, йоча-шамыч тушто ятыр улыт. Шочмо кече але моло пайрем икшывын да кугыеҥынат волгыдо шарнымашеш кодышт манын, нуным оҥайын саламлыман. Тидак Дианам аниматор лияш таратен. Тыге тудо сур Маскам налын. Тыгай кугу да пушкыдо модыш кӧргыш «пурен», пайремлашке миен саламла. Интернетыш видеом вераҥдымеке, моткоч шуко еҥ Маскам шке пайремышкыже ӱжаш тӱҥалын. Маскажлан ӱдыр вургемым але пӧръеҥ костюмым чикташ лиеш – кӧлан кузе келша. Йочан шочмо кечышкыже але кугыеҥын лӱмгечышкыже ынде эше Мераҥымат ӱжыкташ лиеш. Диана Унчыш веле огыл, моло яллашкат кудалыштеш.
– Кугу пушкыдо модыш кӧргыш пурен шогалаш да еҥ-влакым веселитлаш неле огыл манын шоналташ лиеш. Такшым тидым ышташ куштылго манаш ок лий. Костюм кӧргыштӧ пеш шокшо. Адакшым кажне саламлымашлан ямдылалтман: мурым келыштарыман, калыкын кумылжым савырен моштыман, видео ден фото-влакым ыштен шуктыман. Мыланем тыгай годым авам полышкала, – манеш Диана.
Ава да пелаш
Паша – паша дене, ешыжланат самырык ава да пелаш жапым эре муэш. Диана ден Мишан ешым чумырымыштлан шыжым кум ият лиеш. Пӧръеҥ контракт почеш служитла. Ача-авам кок ияш Саша эргышт куандара.
Кеч-кушто: изи ялыште але кугу олаште – шкалан келшыше пашам муаш да каньылын илаш лиеш манын палемдыш Д.Липатникова. Тӱҥжӧ – шке пашам йӧратен ыштыман да ӧрканыман, лӱдын шогыман огыл. Тидланже шуко йӧн уло, нунын дене пайдаланен гына моштыман. А лишыл еҥ-влакын полшымыштлан, эре пелен улмыштлан Диана таум ойла.
Еш альбом гыч налме фото-влак.