Таче шуко самырык еҥ фольклор ансамбльыште шке мастарлыкшым ончыкта. Нунын кокла гыч иктыже – Кужэҥер район Йывансола ялын шочшыжо Василий Поликарпов.
Кок вере шукта
Василий йочасадыштак марий мурылан да куштымашлан кумылаҥын. Кызыт изаж дене коктын ансамбльыш коштыт.
– 2015 ийыште Йывансола тӱвыра пӧртын «Мурсескем» ансамбльышкыже ушненам, а 2020 ийыште – МарГУ-н «Марий мурсем» ансамбльышкыже. «Мурсескем» – марий тӱвырам тукым гыч тукымыш шуйышо ансамбль. «Марий мурсем» тӱрлӧ кундем гыч самырык еҥ-влакым чумыра да тӱрлӧ калык куштымашлан да мурылан туныкта. Репетиций-влак тӱрлӧ кечын эртат, сандене кок вережат коштын шуктем. Кажне ансамбль дене тӱрлӧ конкурс ден мероприятийыште вийнам тергена. Тыгак яллашкат лектын коштына, ятыр гана тӱрлӧ кундемыш марий койышым ончыкташ миенна, – палдара В.Поликарпов.
2017 ийыште «Мурсескем» ансамбль «Эх, сӱан, сӱан, сылне марий сӱан» кинофильмым сниматлен. Тушто рвезе ик тӱҥ качын рольжым модын.
Паша деч ок лӱд
В.Поликарпов Марий кугыжаныш университетыште «Агроинженерий» направлений дене тунемын, кызыт магистратурышто шинчымашым пога.
– Ешемын технике, ялозанлык дене кылдалтмыштым изинек ужынам, сандене шкежат ты сомыллан кумылаҥынам. Ты направлений дене тунемаш тӱҥалмеке, техникын кузе ышталтмыже да уэм толмыжо нерген шуко ум да оҥайым пален налынам.
Ончыкыжым шке профессий денак пашам ышташ шонем да Кужэҥер посёлкыш «Куженерское» организацийыш пашаш пурынем. Кеҥежым мый ты организацийыштак тыршенам: Кировец К-742 трактор дене кудалыштынам, ӱдымӧ комплекс дене шурным ӱденам, шыжым зернотокыш погымо шурным шупшыктенам. Икманаш, мланде дене кылдалтше паша мыланем моткоч келша, – ойла рвезе.
Шочмо кундемнан пӱрымашыже, ончыкылыкшо – самырык еҥын кидыштыже. Сандене Василийлан тыгаяк чолга кодаш да шке шонымашкыже шуаш тыланена.