COVID-19 черлан кöра тылзе наре мöҥгыштö улына гынат, «Не Иван, или как приручить Богатыря» фильмын группыжо паша деч посна огеш шинче.
Тений телым Марий кундемын чолга эргыже, самырык актёр да режиссёр Денис Шаблий Онар патыр нерген модыш сынан кÿчык фильмым войзаш шонен пыштен.
Фильм нерген изишак палдарен кодена. Йыван лÿман самырык рвезе шуэн вашлиялтше лÿмжылан да акцент дене кутырымыжлан кöра оласе у школышто «ош корак» лийын. Коважын темлымыж почеш, Йыван Онар патыр деке полышым йодаш кая. Но нимогай юзо вийым, полышым рвезе огеш му, сандене шке лÿмжым вашталташ да родо-тукымжо деч кораҥаш шонен пышта. Тиде пагытыште Йыван деке Онар шкеже толеш да шке мастарлыкше ден марий калыкын вийже нерген каласа.
– Тиде фильм полшымо дене ме ончыч поро шонымашан еш кинон акшым кÿзыктынена. Самырык-влак коклаште вашлиялтше неле йодыш-влакым, ача-ава ден йоча кокласе умылыдымаш да икымше йöратымашын вийже нерген сюжет-влакым ончыктена. Пытартыш жапыште вес элласе герой-влак дене кугешнена, но шке Талешке-влак нерген монденна. Мемнан фильмна Голливудысо комикс-влаклан шкешотан «вашмут» лиеш, – ойла кинон режиссёржо Денис Шаблий.
Тиде кином войзаш https://planeta.ru/ campaigns/neivan порталыште оксам погат. 20 май марте, тиде ссылке дене пурен, проектым илышыш пурташ шийвундо дене полшен кертыда. Тидлан чонлан келшыше сувенирым налыда, а окса фильм войзаш кая.
Марий Эл Республикысе тÿвыра, печать да калык-влакын пашашт шотышто министерствыште проектым кÿкшын акленыт. Тудым илышыш пурташ кинематограф-влак Владимир Хотиненко, Владимир Фенченко, Зоя Кудря келшеныт. А Онарын рольжым Голливудысо да Российысе киноактёр Олег Тактаров модаш тÿҥалеш. Кызыт проектын командыже 80 тÿжем теҥгем поген шуктен. Но тиде кÿлеш оксан пелыже веле. Туге гынат, команде ты фильм марий калыкым Россий кÿкшытыштö гына огыл, тÿнямбал кумдыкышто чапландара манын ÿшана.