Шукерте огыл марий калыкын тӱвыра чондайже у фильм дене пойдаралте – Марий Элын шочшыжо, Российысе актёр, режиссёр Денис Шаблий «Не Иван, или Как приручить Богатыря» кӱчык метражан фильмым калык ончыко лукто. Премьер 5 ноябрьыште М.Шкетан лӱмеш Марий драмтеатрыште лийын.
Премьер деч ончыч фильм Интернетыште лектын гынат, тудым кугу экраныште
ончаш кумылан еҥ шагал огыл ыле. Ты кечын фильмыште модшо герой-влакат, съёмко пашам виктарымаште тыршыше-шамычат, школлаште тунемше да туныктышо-влак погыненыт.
Туткарыш логалше Йыван лӱман марий эрге Онар патыр дене палдарыше йомак сынан фильм ончышо-влак коклаште тӱрлӧ шонымашым шочыктен. Куаныме да кугешныме кумыл, поро да сай мут коклаште умылыдымаш сынан ойжат вашлиялтеш. Икмыняр еҥ деч пуйто фильмыште «буллинг» (шкетын я тӱшкан ик еҥ ваштареш шогымаш, тудым
игылтмаш) темым тарватыме манмымат колаш логале. Такшым ты койыш илышыште чынак вашлиялтеш гын, молан тудын нерген палдараш ок лий? Ала
лач тыге икшыве-шамычат, кугыеҥ-влакат шке койышышт нерген шонкалаш тунемыт да сай ден осалжым ойыраш тӱҥалыт? Тылеч посна южо еҥже фильмыште Онар патыр ден торжа койышан икшыве-влак кокласе кредалмашым сай сӱрет огыл манеш. Тидыже, очыни, фильмым умылыде ончымо нерген ойла. Молан манаш гын сюжет почеш торжа койышан Егор да тудын кок йолташыже ваштареш Онар огыл, а Йыванын изаже кучедалеш, шольыжым арален налеш. Лач комдык камвочшо да вуй дене перныше изи Йыванын шинчажлан шочмо изаже Онар патыр семын коеш…
«Не Иван, или Как приручить Богатыря» фильм
порылыкым чапландарыше, волгыдо кумылым шочыктышо, келшымашым аклаш туныкта. Тудо марий калыкын койышыжым, кумылжым почын пуа. Арам огыл шыдешкыше Йыванын осал койышан Егорлан ӱчым шукташ тыршымыж годым нимо шот ок лек: я рюкзак омса кылеш пижеш, я мушкындо мечыш веле миен тӱкна. Вет ӱчӧ – тиде марий калыкын койышыжо огыл. Марий калык осалым порылык дене сеҥен мошта, торжалыкым тыматле койыш дене лыпландарен, ужмышудымашым йӧратымаш дене алмаштен кертеш. Тудын кӧргӧ вий-куатше – акрет йӱлаште да кугезе-влакым жаплымаште.