16 мартыште М.Шкетан лӱмеш Марий драмтеатрыште Марий Эл Республикысе тӱвыран сулло пашаеҥже, Марий Эл Республикын Калык поэтше Зоя Дудинан «Луй модмо вер» усталык да порылык касше эртен. Тудым кино да театр артист, поэт Йыван Кырлам шарныме лӱмеш пӧлеклыме. Вашлиймаш «Кырланур – луй модмо вер» проектын ик ужашыжлан шотлалтеш. Тудым илышыш шыҥдарыме паша икмыняр ий шуйна.
Зоя Дудинам пагалыше, усталыкшым аклыше ятыр еҥ погынен, чон гыч лекше шагал огыл поро шомакым ойлен. Пайрем касын программыже пеш ойыртемалтше, поян ыле. Театрын фойештыже тӱрлӧ ончерым чумырымо лийын.
Пайрем кас ончаш толшо-влакым поэзий, сылнымут деке лишемден. Икымше ужашыште Йыван Кырлан да Зоя Дудинан почеламут аршашыштым Шкетан лӱмеш драмтеатрын артистше-влак сайын лудыныт.
Кокымшо ужашыште Зоя Дудинан почеламутшылан возымо ятыр муро йоҥген. Поэтессе «Кырланур – луй модмо вер» проектым илышыш кузе шыҥдарыме, ончыкылык пашаж нерген каласкален.