«КЫРЛАНУР – луй модмо вер» проектын авторжо – журналист, Марий Эл Республикысе тӱвыран сулло пашаеҥже Зоя Дудина. Ты проект моткоч кӱлешан йодышым решатла: марий ялым, шочмо ялым тӱзаташ, тудын пӱртӱсшым, поянлыкшым арален кодаш да тыште шочын-кушшо уста поэт, актёр Йыван Кырлам эше ик гана чапландараш. Ты проект кӧргыштак экскурсовод Наталия Дудина «Кырланур» турист маршрутым почын. 12 мартыште ты маршрут почеш Шернур районыш икымше гана миен коштыныт.
Мероприятий Йошкар-Олаште кӱртньыгорно воктене Йыван Кырлалан памятник воктеке пеледышым пыштыме гыч тӱҥалын. «Тек тиде событий историйыш шыҥдаралт кодеш, вет ме Кырлан шочмо кечыже вашеш пырля погынен, ик кечым лач тудлан гына пӧлеклена», – каласен уна-влакым вашлийме годым проектым вуйлатыше З.М.Дудина.
Йыван Кырлан кундемышкыже ты гана Российысе марий-влакын национально-культурный автономийыштым вуйлатыше Лариса Яковлева (тудо Купсолаште Йыван Кырлалан шарнымашан кӱм шогалтыме шотышто тӱҥалтышым пыштыше-влак кокла гыч иктыже ), Марий Эл Республикысе Правительстве председатель М.Васютинын секретариатшым вуйлатыше Эдуард Чемышев, республикысе тӱвыра, печать да калык-влакын пашашт шотышто министрын алмаштышыже Игорь Садовин да молат лийыныт.
Уна-влакым поян литературный маршрут вучен: Шернурышто А.Конаков лӱмеш тоштер-ончер комплексыште лийыныт, Купсолаште Йыван Кырлалан вераҥдыме кӱ воктеке пеледышым пыштеныт, Марисола школын тошто зданийыштыже верланыше Йыван Кырла лӱмеш сылнымут да краеведений тоштерыштым ончен лектыныт, Марисола школ дене палыме лийыныт (тушто Йыван Кырла тунемын), тысе «Гармония» ансамбльын выступленийжым онченыт.
А вес тыгай туристический маршрутым Кырлан колымо кечыж вашеш, июльышто, эртараш палемдыме. Тушко кумылан кажне еҥ ушнен кертеш.
Наталия Дудина, Ирина Степанова.
Н.Дудинан фотожо-влак.
Проектын авторжо Зоя Дудина:
– Ты пашанан тӱҥ задачыже: Йыван Кырлан шочмо Купсола ялжым рӱдер семын ышташ. Тыште социально-бытовой условий сай лийже. Пӱя, памаш-влак пыташ тӱҥалыныт, нуным эрыкташ, шотыш кондаш кӱлеш. Йыван Кырлан пӧртшым почаш. Чыла тидым ышташ проект почеш шым ийым палемдыме. Верысе калык дене ваш полшен, келшен пашалан пижына гын, чыла шонымашна шукталтеш, шонем. А мый поснак куанем. Вет Купсола – мыйынат шочмо ял.