Йыван Кырла лудмаш годым Марисола школысо тоштерыш пурышна. Тушто ондак земский школ лийын. Лач ик классыштыже 1921-1922 ийлаште Йыван Кырла тунемын. Тысе ик пӧлемым Йыван Кырлалан да сылнымутчо-влаклан пӧлеклыме.
Тоштерым марий да руш йылмылам, литературлам туныктышо С.М.Максимова вуйлата. Тыште 2021 ийыште ачалкалыме пашам ыштыме, стенд-влакымат уэмдыме.
«Йоча-влак дене кажне ийын Йыван Кырла дене кылдалтше шымлымаш пашам возена. Тылеч вара «Йыван Кырла – Мустафа рольышто» у стендым ыштышна. Марисола школысо литературный кружокын пашаж нерген ятыр материал уло. 1974 ий годсек тудым Зинаида Ермакова вуйлатен. Тунамсе йоча-влак кызыт палыме писатель улыт. Кызыт кажныж нерген стенд-влакым ышташ фотографий, статья, книга-влакым погена», – ойла Светлана Мартыновна.
Лӱмлӧ туныктышо З.В.Ермакова тоштер нерген тыгерак каласкалыш:
– 1988 ийыште Кырлан Татьяна акаже илымыж нерген пален нальым да туддеке кайышым. Туддене угыч вашлийме нерген кутырен келшышна.
Кокымшо гана школ автобус дене миенна ыле. Тунам Татьяна Ивановна мемнам порын вашлие да каласыш: «Икымше вашлийме деч вара мый изам нерген мо уло, чыла поген ямдыленам». Теве тиде патефоным луктын шындыш да каласкалыш, кузе тудо Тамара пелашыж деке тиде патефоным нумал коштын. Кӧргышкыжӧ пеледыш аршашым пыштен, а южгунамже – тамле йошкар аракам. Ик жап гыч нуно пырля илаш тӱҥалыныт.
Костюмжын пинчакшым да жилетшым пуыш. Вара серышыже-влакым кучыктыш. Кидышкем Йыван Кырлан кум серышыжым налмеке, чыла буква тӧрштылын… Йыван Кырлан кидше дене 1938, 1939 да 1940 ийлаште Карелий гыч возымо серыш-влак. Вара Татьяна Ивановна ешарыш: «Эше ик серыш лийын. 1943 ийыште шем шыжым Омск ола гыч номерной завод гыч толын». Варажым мемнан ончылнат шондык пундашыште кычале, но ыш му. «Очыни, – мане, – осалыш каен, шеҥше-влак тыште шукын лийыныт. Вара ӱстембаке Йыван Кырлан бюстшым луктын шындыш да каласыш: «Тек ынде Йыван Кырла тендан дене ила».
Конден шындышым тиде пӧртышкӧ да каласышым: «Кырла чӱчӱ, теве ынде тый тыште илаш тӱҥалат, тый денет пырля – Шернур районын сылнымутчыжо-влак, нуно тынар шукын улыт».
