Мемнан кугезына-влак тӱрлӧ йӱлалан ӱшаненыт. Ик эн юзо кечылан да йӱдлан (7 гыч 8 июль) Йыван Купача шотлалтын. Тыгодым теве мом ышташ ок йӧрӧ:
– Ты йӱдым пӱяште йӱштылаш огыт темле, ия кучен да вуйушым налын, вӱд йымаке шупшын наҥгаен кертеш.
– Иктаж-мом ужаледа але оксам арымеш пуэда гын, пиал ден сай илыш кораҥ каен кертыт.
– Ты кечын моторлан пеледышым пӱчкын ида нал. Аршашым ыштынеда гын, тудым лучо вондыж гыч тодылза.
– Уда нерген ида шоно, ида йокроклане – илыш тыланда куаным кужу жап ок кондо.
– Ты кечын кенета оксам муыда гын, тудым саде верыштак кодыза, налыда гын, тазалыкда начаремын кертеш.
Тыгак ты пайрем деч ончычсо йӱдым тӱрлӧ йӱлам шуктеныт. Поснак чер деч эрнаш, осал деч кораҥаш, поян лияш шонен, висвис да вуйшӱдыш дене, тыгак тулотышто, вӱдыштӧ мужедыныт.
Йыван Купача годым калык палыланат чот ӱшаненыт. Ты кечын йӱр «шортын» гын, вич кече гыч веле кече «воштылаш» тӱҥалеш, маныныт. Кӱртньышудын (папоротник) лышташыже ӱлыкыла пӱтыралтын гын, шокшо да кечан игече лиеш. Ир янлык-влак чодыра гыч тӱшкан лектыт гын, икмыняр кече гыч кошкымо пагыт толеш. Йыван Купача йӱдым шӱдыр шуко – поҥго ятыр шочеш, кол сайын чӱҥга; лупс налын – кияр сайын шочшашлан.