Морко кундемыштына этнокультур предметлам туныктышо-влакын черетан методушем погынышт Шӱргыял школышто эртаралте. Тушко 14 туныктышо ушнен.
Мый шочмо школыштем ынде 18 ий туныктем. Школышто шке коллегем-влакым вашлияш мылам пеш кугу пиал ыле. Шочмо сылнымут дене виш урокым эртарышым. 5-ше классыште 5 икшыве тунемеш. Кажныже яндарын марла кутыра. Тӱҥалтыш класслаште рушла ойлен колтышо Надеждана Сергееват марла веле пелешта.
Школыштына «Марий сылнымут садвечыште» кружок уло. Тушто эн чолга тунемше-влаклан адакат 5-ше классак шотлалтеш. Нуно кружокыш кажне гана куанен толыт да могай сомылым шукташ тӱҥалме нерген ончылгоч йодын шогат. Уна-влак ончылнат «Шкемын марий шӱлышемым кугезе мландыште таптем» теме дене урок деч ӧрдыжысӧ пашам почын ончыктышна.
5-ше класс тӱрлӧ теме дене синквейным ик изи татыште шонен луктын йоҥгалтарышт, 6-шо класс «Микмек» сценкым модыч, 7-ше класс эрге-влак шиялтыш почеш тошто марла куштымашым ончыктышт, 8-ше класс литературно-музыкальный композиций полшымо дене кружокын паша лектышыж дене палдарыш. А тӱҥалтыш классыште тунемше икшыве-шамыч дене Людмила Николаевна Кириллова «Лумкурчакын нерже йомын» сценкым рок-муро гоч марла йоҥгалтарышт. Тидыже уна-влаклан пеш чот келшыш.
Вара школ тоштерыште экскурсийым эртарышна. Тачысе кечылан тоштерна уэмын, кок ужаш дене пашам шуктена. Иктыже кугезе илыш-йӱлам почын ончыкта гын, весыже СВО-што вуйыштым пыштыше мемнан кундемысе салтак-влакын подвигыштлан пӧлеклалтын. Тоштерыштак Даниэль Кугергин шке серыме «Россий» почеламутшым йоҥгалтарыш гын, Надежда Сергеева Йоплан ялын геройжо Сергей Крылов лӱмеш серыме «Война» почеламутшым лудо.
Елена Григорьева, Шӱргыял школын марий йылме туныктышыжо.
Снимкыште: Морко районышто этнокультур предметлам туныктышо-влакын Шӱргыял школ пӧрдемыште эртаралтше семинарышт годым.