15-20 июльышто Башкортостан Республикын Благовещенск олаште «Марий йылме лагерь-2025» пашам ыштен.
Тений лагерьыш Моско, Санкт-Петербург, Ленинград кундем, Киров область, Йошкар-Ола, Екатеринбург гыч 10 еҥ толын. Нуно марий йылмым тунемаш, марий тӱвырам, историйым келгынрак пален налаш кумыл дене ушненыт, южышт – икмынярымше гана.
Лагерьыште кажне кечын марла кутыраш тунемме занятий Благовещенск оласе рӱдӧ эмлымверыште эртаралтыныт. Икымше кечын книгагудо дене палыме лийыныт да кечывал деч вара олам ончен савырненыт.
Кокымшо кечын Бирск гыч филологий науко кандидат С.И.Апсатарова толын да марий йылме, тудын историйже нерген каласкален. Тыгак йылме блок-влак шотышто занятий эртаралтын. А кастене участник-шамычым верысе «Оҥгырйӱк» фольклор ансамбльым вуйлатыше И.В.Аптыкаева мӧҥгышкыжӧ ӱжын, эрвелмарий-влак нерген каласкален.
Кумшо кечын, 17 июньышто, лагерьыш ушнышо-влак Бирск – Кужнур – Мишкан корным эртеныт. Нине вершӧрлам ончен коштыныт. Мишканыште Марий историй да тӱвыра рӱдерышке, «Триумф» ФОК-ыш, полилингвальный школыш миеныт. Школышто нуным директор С.В.Хазиев, завуч О.Д.Яманаева да марий йылмым туныктышо Н.Г.Салиева вашлийыныт.
Тиде гана лагерьым эртарымаште туныктышо И.Г.Тойгильдина кугун полшен. Тудо Благовещенскысе педучилищыште марий йылмым ятыр ий туныктен, кызыт Санкт-Петербургышто ила.
Йылме лагерьым Ленинград кундемысе «Ший корно» национально-культурный автономий (вуйлатышыже – Л.В.Арламова) «Этнокультура и язык народа мари» проект почеш нылымше гана эртарен. Тидлан марий-влакын Благовещенск оласе да районысо «Эрвел Марий» автономийлан, тудым вуйлатыше Р.Т.Мусагитовлан да алмаштышыже И.В.Аптыкаевалан тауштат.
Эльвира Терентьева.