Вич ий ончыч ӱдырым налынам. Пелашем дене утыжым поян огына иле, нужнанракынат, манаш лиеш. Чияш вургемым але пӧртлан арверым шуэн наледена.
Пелашемын телефон гарнитуржо тоштемын. Ик тылзын пашадар гыч 500 теҥгем наушниклан пыштен коденам. Тидын дене пелашемым куандараш шоненам. Кастене эрлак паша деч вара кевытыш каяш да гарнитурым налаш кутырен келшышна. Но эрдене пашаште ойган увер дене палдарышт. Пырля пашам ыштыше ик пӧръеҥын эргыжлан кум ий ончыч ик шинчажлан операцийым ыштеныт. Тудын онкологий вияҥын. Шукерте огыл вес шинчашкыжат куснымо нерген пален налыныт. Операцийым писын ыштыман. Тидлан шагал огыл шийвундо кӱлеш. Пашаште 500 теҥге дене кажне пашаеҥ деч погаш кутырен келшенна. Наушниклан кодымо оксам пелашем рвезылан пуаш йодын, вет мӧҥгыштӧ тетла уто окса лийын огыл. «Мый вучалтем, а рвезе таза лийже» манын.
Кумшо паша смене деч вара ныл шагат эрдене мӧҥгӧ пӧртылмем годым пӧрт воктене лумышто шем арвер кийымым ужынам. Лишкырак миенам да йыргешке футлярым муынам. Туштыжо – наушник. Йочала куаненам. Йырым-йыр ончыштынам, нигӧм шекланен омыл. Гарнитур шулдо акан огыл, эшежым пелашемын телефонжо гаяк тӱсан – шӧртнялге.
Кузе тыге лийын да кӧ тудым пыштен коден? Тачат огына пале. Очыни, тӱняште ала-могай юзо вий уло.
Андрей О.
Козьмодемьянск.