Таче, 5 мартыште, Икымше канал дене ончыктымо «Юзо пасу» передачыште Звенигово оласе 3-шо №-ан школын туныктышыжо Н.Н.Бочкарёва модеш.
Тудын дене пырля Москошко 9-ше классыште тунемше Софья ӱдыржӧ миен. Тыгак передачыште Марий кундемыште палыме «Юлавий» мурышо ансамбльым ужын да колышт кертыда. Вуйлатышыже – Марий Эл тӱвыран сулло пашаеҥже Л.М.Смирнова. Коллективын ныл участницыже «Юзо пасун» сценыштыже «Ай пеш чевер» мурым муралтен. «Лач тынарын тусо изи сценыште йытыран койыт», – ойлен передачын режиссёржо.
Тунемме да воспитаний паша шотышто директорын алмаштышыже Н.Н.Бочкарёва историйым да обществознанийым 10 ий туныкта. Тылеч ончыч Надежда Николаевна Звенигово оласе да районласе тоштерлаште пашам ыштен. «Юзо пасушко» модаш йодмашым шкеак колтен. Туддеке ӱжмаш толмеке, кундемын тӱсшым ончыктышо иктаж коллектив кӱлеш маныныт. Ты передаче Ӱдырамаш-влакын тӱнямбал кечыштлан пӧлеклалтын. Передачысе йодыш-влакат ӱдырамашын тошто чиемже нерген лийыныт. Мотор марий вургеман марий ӱдырамаш ден ӱдыр-влак пайрем передачым чо-о-от сылнештареныт.
Кандаш еҥан делегацийлан Звенигово районысо администраций да икмыняр спонсор полшеныт, машиным ойыреныт, унагудо роскотым петыреныт.