МарГУ-н студенткыже Екатерина Аверина 1-ше курсышто тунемше магистрант-влаклан эртарыме Россий Президентын грант конкурсыштыжо сеҥен.
Тудо «Система предупреждения преступности в сфере оборота цифровой валюты» пашаж дене ойыртемалтын. Екатеринам самырык политический лидер-влакын федеральный реестрышкыже пуртеныт, тыгак «Депутатский резерв» шӧртньӧ знак дене палемдыме. Грантым налаш манын, ты конкурсышто гына сеҥыме огеш сите. Эше шанче-шымлыме пашаште ойыртемалтман.
Е.Аверина 2021 ден 2022 ийлаште Белоруссийысе кугыжаныш университетын студентше, магистрантше, аспирантше-влаклан эртарыме тӱнямбал конференцийыште сеҥен, МарГУ-со «Вестник» газетыште материалже савыкталтын. 2021 ийыште Марий Элым Вуйлатышын стипендиантше лийын.
– Мый Амур областьысе Сковородино олаште шочынам. 2012 ийыште Йошкар-Олаш илаш кусненам. 7-ше классыште тунемме годымак юрист лияш шоненам. Шанче пашам Российыште да йотэлыште криптовалютын оборотшым (оксасавыртыш) анализироватлыме дене кылдалтын. Российын отраслевой законодательствышкыже вашталтышым пурташ темленам, – мане Е.Аверина.