Марий Элым Вуйлатыше Юрий Зайцев тений республикнан бюджет оксам кучылтмыжо да парышыже нерген Москошто РФ-н Кугыжаныш Советшын «Экономика и финансы» направленийже дене комиссийын заседанийыштыже каласкален.
Тушто 2025-2026 ийлаште субъект-влакын консолидированный бюджетшым шуктымо йодышлам каҥашеныт.
– Республикыштына 60,2 млрд теҥге роскотым петырыме. Тидыже социальный обязательствым тичмашнек шукташ, тыгодымак специальный военный операцийысе участник-влаклан полышым пуаш полша. Республикнан парымыжым кок пачаш нарылан шагалемден кертынна, – увертарен регионым Вуйлатыше.
Корно фондын средстважым шотлыде, республикыш 2024 ий дене таҥастарымаште 12,3 процентлан шукырак окса толын. Тений бюджетын парышыж шотышто чыла показательым шуктышаш улына.
2025 ий 1 декабрьлан Марий Элын парымже 4,6 млрд теҥге лийын, идалык тӱҥалтыш гыч 1,9 пачаш шагалемын. Вес ийлан роскотын эн ончычак шукташ палемдыме кугытшо тӱрыснек шукталтшаш.
Эн ончычак экономикым вияҥдымаште Россий Президент Владимир Путинын инициативыж почеш шыҥдаралтше республикым социально-экономически вияҥдыме программе кугу верым налеш. 2025 ийыште экономикысе отрасль-влаклан полшымо, 848 млн теҥгеаш 22 инвестиций проектым шыҥдарыме, 2,6 млрд теҥге бюджетный огыл инвестицийым кондымо.