Юмылан мурен ошкылынна

Кава ден мланде коклаште илена гын, тугеже Юмын шӱлышым шӱлена. Чоннам яндарын кучаш тунемын шуына гын, илышымат вес шинча дене ужына. Садлан кажне еҥ Юмым йӧратымаш, тудлан  ӱшанен, поро шонымаш дене илымаш.

Кажне ийын майын икымше рушарнян, Святой Николай Чудотворецым шарныме кече деч вара,  Волжск оласе «Всех скорбящих Радость» храм гыч Крестный ход тӱҥалеш.  Шнуй Гурий лӱмеш Пӧтъял черке гыч кондымо «Смоленская» (Седмиезерная) Шочынава Юмоҥа дене 26 майыште Волжск ола гыч лектын да 21 июньышто Морко районысо Изи Кугунур ялыш толын шуыныт.

18-19 июньышто Морко посёлкысо Юмо кончымо лӱмеш черкыште Марий митрополийын икымше миссионер погынжо лийын. Тений черкылан 200 ий темеш. Ты гана «Волжск – Морко» Крестный ходланат 20 ий темын.

 

1 июньышто Провой велне лиймем годым Крестный ходын эртымыжым  ужым да ошкыл эртыше-влакын тӱшкашке ушнаш вигак кумылаҥым. Тыге Эҥервож ялышке пурышна, тушто илыше-влак  ӱстел чес ден мемнам вашлийыч, ошкылшо-влак каналтышт, а батюшка еҥ-влак дене мутланыш. Вара паломник-влак воктенсе яллашке кайышт, а мый 19 июньышто Морко районыш кайыше  маршрутыш логалаш шканем мутым пуышым да шӱм-чонем дене ямдылалташ тӱҥальым. Вет ты кечылаште нуно Морко посёлко гыч  мыйын шочмо Волаксола ялышкем каят.

Ты кечын Крестный ходым Морко черкын протоирейже Леонтий Очетов вӱден наҥгаен. Мый  Кугу Кожлаялыште паломник-влак деке ушнышым да Чишкан – Смычке – Волаксола ялла марте ошкылшемла,  Юмын шулдыр йымалне улмемла чучо. Тыглай кечын ик меҥгымат йолын каяш ӧрканена, а чонлан куштылго годым тидым от шиж улмаш. Паломник-влак туге писын ошкылыт, вараш кодат гын, нуным поктен шуаш моткоч йӧсӧ. Илышыштат тыге: вараш кодат гын, шуктымо пашат ушнен огеш тол.

Мемнан ӱмыргорнына могай,  кузе ме тудым илен эртена? Сулыкым ыштена, осал койыш-шоктышан, еҥлан кӧраныше, сырыше улына, амал деч посна вурседылына да тулеч моло уда вийым шке ӱмбакына шупшына?  Крестный ход годым тыглай гына ошкылмылан огыл, а Юмо да Шочынавалан кумалын, молитве мурым мурен, чыла сайым да аралтышым йодын эртыме корнылан шотлалтеш. Крестный ходым эртарыше-влакын шонымашышт –кушкын толшо тукымым духовный, нравственный да патриот шӱлышеш кушташ, Юмын йӱлам кучаш, шукташ, православный культур дене палдараш. Тӱрлӧ калык-влак коклаште келшымаш кылым ышташ, осал вий, сар ваштареш шогаш. Тыгак шӱм-чон да капкыл дене яндар, поро пашам гына ыштыше лийын илаш.

Юмым сӧрвален кумалме еҥ-влакын уш-акылыштым волгалтара, сулыкым ыштыме деч эрыкташ туныкта.

Чишкан ял гыч пасу гоч Смычкышке миен шуынна. Корно дене ошкылаш куштылгак огыл, пуйто Юмо ончыкта: нелым сеҥет –ончылно сай илыш вуча. Смычке ял гыч Волаксолашке кайыме годым олыкыш савырныше нурышто каналташ шогална. Протоирей Леонтий илышын моторлыкшо, пӱртӱсын сылнылыкше да вуй ӱмбалсе каван узьмакше нерген ойлыш. А тыгодым кечан кечыштак вучыдымын шонанпыл мемнам авалтыш. Кас вашеш Волаксола ялышке миен шуынна, школ кудывечыште паломник-влакын черетан ошкылмышт мучашлалте. 20 июньышто ты ялыштак литургий лие, тудым Шеҥше селасе Казанский Шочынава лӱмеш черкын священникше Евгений Шамаев эртарен. Вара корно Чодырасола –Зеленогорск  – Весьшӱргӧ – Изи Маршан –  Изи Кугунур маршртут дене шуйналте. Ынде Крестный ходын участникше-влакым   Арын черкын настоятельже иерей Николай Чузаев наҥгаен.

Мыят умбакыже ошкылам. Молитвам мурен,  Николай ача почеш каена, а, мылам туге чучеш, пуйто Юмо почеш ошкылам. Корно моткоч кужу: чодыра, пасу гоч але комешталт пытыше асфальт дене эртет. Чынак, неле,  йол корштымым шижаш тӱҥальым, но иерей Николайын кузе чаткан, ончыко вӱден кайымыжым ончал колтымек, Юмын да Шочын Аван полшымышт дене капыш  угыч вий-куат ешаралтеш.

Кажне ялыште порын, кинде-шинчал дене вашлийыныт, тутло сийым пукшен колтеныт. Юмоҥа йымач лектын, юмынвӱд дене чывылалтын, ятыр еҥ шкаланже чон ласкалыкым муын, аралтышым налын, шонем. 21 июньышто Изи Кугунурышто литургий деч вара Юмоҥам Советский районыш наҥгаеныт. Тыге кундемнам тӱрлӧ зиян деч утараш йодын, калык чонышто поро пашалан гына тӱзланашыже кумалын, Крестный ход суапле сомылым шуктен.