Кава ден мланде коклаште илена гын, тугеже Юмын шӱлышым шӱлена. Чоннам яндарын кучаш тунемын шуына гын, илышымат вес шинча дене ужына. Садлан кажне еҥ Юмым йӧратен, тудлан ӱшанен, поро шонымаш дене илышаш.
Кажне ийын майын пытартыш рушарнянже, Святой Николай Чудотворецым шарныме кече деч вара, Волжск оласе «Всех скорбящих Радость» храм гыч Крестный ход тӱҥалеш. Тений тудо Святой Гурий лӱмеш Пӧтъял черке гыч кондымо «Смоленская» (Седмиезерная) Шочынава Юмоҥа дене 26 майыште Волжск ола гыч лектын да 21 июньышто Морко районысо Изи Кугунур ялыш толын шуын. «Волжск-Морко» Крестный ходлан тений 20 ий темын.
1 июньышто Провой велне лиймем годым Крестный ходын эртымыжым ужым да ошкыл эртыше-влакын тӱшкашкышт ушнаш вигак кумылаҥым. Тыге мый 19 июньышто Морко районыш кайыше маршрутыш логалаш шканем мутым пуышым да шӱм-чонем дене ямдылалташ тӱҥальым.
Ты кечын тудым Морко черкын протоиерейже Леонтий Очетов вӱден наҥгаен. Мый Кугу Кожлаялыште паломник-влак деке ушнышым да Чишкан – Смычке – Волаксола ялла марте ошкылшемла, Юмын шулдыр йымалне улмемла чучо. Тыглай кечын ик меҥгымат йолын каяш ӧрканена, а чонлан куштылго годым тидым от шиж улмаш. Паломник-влак туге писын ошкылыт, вараш кодат гын, нуным поктен шуаш моткоч йӧсӧ. Илышыштат тыге: вараш кодат гын, шуктымо пашат ушнен огеш тол.
Мемнан ӱмыргорнына могай, кузе ме тудым илен эртена? Сулыкым ыштена, осал койыш-шоктышан, еҥлан кӧраныше, сырыше улына, амал деч посна вурседылына да тулеч моло уда вийым шке ӱмбакына шупшына? Крестный ход Юмо да Шочынавалан кумалын, молитве мурым мурен, чыла сайым да аралтышым йодын эртыме корнылан шотлалтеш. Крестный ходым эртарыше-влакын шонымашышт – кушкын толшо тукымым духовный, нравственный поянлык да патриотизм шӱлышеш кушташ, юмын йӱлам кучаш, шукташ, православный культур дене палдараш. Тӱрлӧ калык-влак коклаште келшымаш кылым ышташ, осал вий, сар ваштареш шогаш. Тыгак шӱм-чон да капкыл дене яндар, поро пашам гына ыштыше лийын илаш.
Юмым сӧрвален кумалме еҥ-влакын уш-акылыштым волгалтара, сулыкым ыштыме деч эрнаш туныкта.
Чишкан ял гыч пасу гоч Смычкышке миен шуынна. Корно дене ошкылаш куштылгак огыл, пуйто Юмо ончыкта: нелым сеҥет – ончылно сай илыш вуча. Смычке ял гыч Волаксолашке кайыме годым олыкыш савырныше нурышто каналташ шогална. Протоиерей Леонтий илышын моторлыкшо, пӱртӱсын сылнылыкше да вуй ӱмбалсе каван узьмакше нерген ойлыш.
Кас вашеш Волаксола ялышке миен шуынна. 20 июньышто ты ялыштак литургий лие, тудым Шеҥше селасе Казанский Шочынава лӱмеш черкын священникше Евгений Шамаев эртарыш. Вара корно Чодырасола – Зеленогорск – Весьшӱргӧ – Изи Маршан – Изи Кугунур маршрут дене шуйналте. Ынде Крестный ходын участникше-влакым Арын черкын настоятельже иерей Николай Чузаев наҥгаен.
Мыят умбакыже ошкылам. Молитвам мурен, Николай ача почеш каена. Корно моткоч кужу: чодыра, пасу гоч але комешталт пытыше асфальт дене эртет. Чынак неле. Йол корштымым шижаш тӱҥальым, но иерей Николайын чаткан ончыко вӱден кайымыжым ончал колтымек, Юмын да Шочын-Аван полшымышт дене пуйто капыш угыч вий-куат ешаралтеш.
Кажне ялыште порын, кинде-шинчал дене вашлийыныт, тутло сийым пукшен колтеныт. Юмоҥа йымач лектын, юмынвӱд дене чывылалтын, ятыр еҥ шкаланже чон ласкалыкым муын, аралтышым налын, шонем. Кундемнам тӱрлӧ зиян деч утараш йодын, калык чонышто поро паша гына тӱзланыже манын кумалын, Крестный ход суапле сомылым шуктен.
Татьяна ПЧЁЛКИНА.
Фотом интернет гыч налме.
