Йошкар-Ола гыч Кристина Этюева Россий ФСИН-ын Марий Элысе управленийыштыже, 4-ше №-ан исправительный колонийыште, служитла. Охране отделысе кинологический отделенийын инструктор-кинологшо, элгӧргӧ службо прапорщик. Кинолог лияш ӱдырын йоча годсо шонымашыже огыл. Но пий-влакым тудо изинек йӧратен – ешыж дене шке пӧртыштӧ иленыт, кок пийышт лийын.
Акажын корныж дене
– Такшым формым чияш, военнослужащий профессийым ойыраш да погонан лияш изинек шоненам – тукым акам УФСИН-ыште служитлен. Тудак мыланем ты системыште пашам ыштыме нерген шуко каласкален, – ойла К.Этюева.
Школышто Кристина сайын тунемын. Художественный гимнастике, синхронный иймаш, ече секцийлаш коштын. Школ деч вара Марий радиомеханический техникумыш тунемаш пурен, «Финансы» специальностьым ойырен налын. Туштат ече спорт дене пеҥгыде кылым кучен, тренерже Е.Г.Рыбаков дене заниматлен, таҥасымашлаш чӱчкыдын ушнен. Кӱшыл шинчымашым ӱдыр МарГУ-што налын, физкультур, спорт да туризм факультетыште заочно тунемын.
Йокрокланаш ок пу
Кинологлан пашаш ӱжмеке, Кристина шуко шонкален огыл, келшен, вет пий-влакым тудо изинек йӧратен кушкын, нуным сайын пала да умыла.
– 4-ше №-ан исправительный колонийыш службыш ӱмаште толынам. Икымше паша кечем сайын шарнем. Коллектив икоян, садлан мыланем йӧндымын, нелын чучын огыл. Паша верым ончыктеныт, ыштышаш сомыл дене палдареныт. Тудо кечынак нылйолан коллегем, Юланда лӱман немыч овчарке, дене палымым ыштеныт. Начальникем, Сергей Александрович Ермичев, мыланем шкешотан тергымашым эртарен: пий дек мияш, тудым ниялташ ойлен. Мый Юландам лӱдде ниялтенам, тыге «коллегем» дене палыме лийынам. Тӱҥалтыште мый Юланда дене пырля шуко жапым эртаренам: кочкашыже пуэнам, четлык гыч луктын коштыктенам, мыланна икте-весе деке тунемаш жап кӱлын. Такшым немыч овчарке-влак универсальный пийлан шотлалтыт. Тыгай пий тыланет сай йолташ, орол, службышто коллеге лийын сеҥа. Шот дене дрессироватлыме да туныктымо тыгай урлык пий, преступникым поктен шуын кучаш кӱлеш гын, эн сайын полша, – каласкала кинолог.
Юланда – оролышо-кычалше пийлан шотлалтеш. Тудо транспортым терга, верысе кумдыкым орола, инженерно-технический средства-влак шижтарыме годым терга. ФСИН системыште пий-влак тӱрлӧ сомылым шуктат. Учебный пий-влак, мутлан, наркотический але пудешталт кертше веществам кычалыт.
ФСИН системыште ӱдырлан але ӱдырамашлан службым эрташ неле мо манмемлан К.Этюева тыгерак вашештыш:
– Уголовно-исполнительный системыште ӱдырамаш-влак тӱрлӧ должностьышто тыршат. Ме коллективыште морально-психологический обстановкым саемдена манын кертам. Тӱҥжӧ – шке профессием йӧратем. Садлан пашам нелын ок чуч. А нылйолан коллегем мыланем йокрокланаш але кумыл волышо кошташ ок пу.
Эре ончыко, у кӱкшытыш
Службо деч вара Кристина пийым кушкыж кудалыщтме спортлан жапым ойыра, спортын ты видше дене («ече-спринт, 1 пий» дисциплине) профессионально заниматла. Тудо таҥасымашлаште шкенжым терга, ончыл верыш эре гаяк лектеш, тидын нерген ятыр наградыже-влак ойлат. 2025 ийыште К.Этюева спортын ты видше дене Российын чемпионатышкыже каяш шона. Тудын художественный гимнастике, тыгак ече дене таҥасымаш да пийым кушкыж кудалыштме спорт дене 1-ше спортивный разрядше уло. Лишыл жапыште спорт мастерыш кандидат нормативым шукташ.
Яра жапыште Кристина велосипед дене кудалыштеш, куржталеш, ешыж дене жапым эртара. Пийже-влак дене (тудын мӧҥгыштыжат Хан немыч да Анубис бельгийский овчаркыже-влак улыт) пӱртӱс лоҥгаш каналташ лектеш. Спорт да пий-влак – мыйын хобби, палемдыш кинолог.
Службышто К.Этюева у кӱкшытыш шуаш, офицер званиян лияш шона. А ныл йолан коллеге-йолташыже тидлан полша гына.
К.Этюеван альбомжо гыч налме фото.