23 июньышто Чебоксар олаште «Радуга над Волгой» Российысе поэзий фестиваль эртаралтын.
Тудо «Кызытсе жапыште национальный литературым кусарыме да тудын проблемыже-влак» «йыргешке ӱстел» дене тӱҥалын. Вара «Национальный литератур – рушла» мастер-класс лийын.
17 шагатлан Чебоксар олан ик эн мотор верыштыже, Юл эҥерын серыштыже, «Поэзия на Волге» тӱрлӧ йылме дене возымо почеламут лудмаш тӱҥалын.
Мероприятийыш утларакшым самырык возышо-влакым ӱжыныт. Татарстан Республик гыч Гузель Закирова, Миляуша Гафурова, Ульяновск область гыч Александр Дашко, Марий Эл гыч корреспондентна-влак Алёна Яковлева ден Надежда Моисеева миеныт. Шке мутсаскаштым тыгак Чуваший Республикыште палыме да пагалыме поэт-влак пӧлекленыт.
Пайремым Чувашийысе самырык еҥ-влак «Синтез искусств» поэзо-художественный перфоманс дене сӧрастареныт. Мо оҥайже, ӱдыр-рвезе-влакын семӱзгарым шоктымышт годым куштызо Владимир Елизаров сем почеш капкылже дене тӱрлӧ движенийым ыштен, тиде жапыштак художник Инна Бритвина сӱретым ямдылен. Ӧрдыж гыч ончымаште сӱретче, куштызо, музыкант-влак ик тичмаш гае койыныт.
Чебоксарыште илыше мурызо Максим Китаев руш поэт А.Пушкинын почеламутшо-влаклан кызытсе жаплан келшыше семым возен да еҥ-шамычлан «Пушкин SUPERSTAR» концертым ончаш темлен.