Тений шошым Юл вӱд гоч пассажир-влаклан у маршрутым почмо. Ты сомылым «Водолёт» компаний виктара. Компанийын СПК Метеор 125Р ийын коштшо транспортшо еҥ-шамычым кӱлеш верыш писын да комфорт дене намиен шукта.
Транспорт май тылзе гыч коштеш. Тунам тудо Озаҥ ола марте веле пассажир-влакым кондыштарен гын, июнь гыч Ульяновск марте маршрутшым шуэн.
Марий Элыште илыше-шамычлан Козьмодемьянск оласе у причал гыч Ульяновск, Озаҥ, Чебоксар, Угарман марте чон канен, миен шуаш йӧнан. Палемдыман, пассажир-влаклан тыгак тӱрлӧ точкылаште оҥай да пайдале мероприятий-шамычым эртарат. Тидлан лӱмын палемдыме жап ойыралтеш, тыгодым транспорт чарнен шогалме верыште икмыняр шагатым эртара. Пассажир-влакым тошто черке да монастырь, Российыште илыше тӱрлӧ калык-шамычын йӱлашт да тӱвырашт, ойыртемалтше верла дене палымым ыштат. Эҥерысе пейзаж, яндар юж, вӱдтолкынын транспорт почеш веселан модмыжо чоным куандарат, вуйушым кандарат. Тылеч посна ты маршрутым кучымо годым элнан тӱрлӧ олалажын историйже дене палыме лияш йӧн уло.
Йӧнан транспорт
10 июльышто Марий Элысе Спорт да туризм министерстве журналист-влаклан Метеор 125Р транспорт дене Чебоксар гыч Козьмодемьянск марте пресс-турым организоватлен. Мыланемат ты йӧн дене пайдаланаш пиал лийын.
Кечывал деч вара 13 шагатат 40 минутлан вӱд йымалысе шулдыран транспорт (Метеор 125Р транспортым вес семынже тыге маныт) Чебоксар оласе Эҥер порт дене лийын. Тудо Озаҥ ола гыч кум шагат наре толын. Ты жапыште пассажир-влак Татарстанысе, Чувашийысе, Марий Элысе пӱртӱсын моторлыкшо дене палыме лийыныт.
Чебоксарысе портышто транспорт утыжым шуко ок шого. Пассажир-влак суднош логалме деч ончыч сай тергымашым эртат, вара веле шинчыт. Судно кӧргыштӧ чыла шотыштат йӧным келыштарыме. Телевизор, кондиционер, шондан, телефоным зарядитлаш розетке улыт. Чай, кофе, вӱд темлалтыт. Шинчыме вер кум радаман. Кок могырым кок еҥ дене, покшелне шукыракын шинчен кертыт. Тидыже йырым-йырысе сӱретым шекланаш нимынярат чаракым ок ыште. Тушечынат чыла сайын да раш коеш. Шинчыме вер ончылно вӱдым але иктаж вес настам шындаш изирак ӱстембалым почаш лиеш. Тудын кӱлешлыкше уке гын, петыраш лиеш. Судно кӧргыштӧ, самолётышто улмыла чучеш, тольык тыште обзор куграк.
Ик шагат
Чебоксар гыч Козьмодемьянск марте транспорт шагат наре кая. 14 шагат шушаш дене тарваныме гын, 15 шагат лишне палемдыме верыште лийме. Метеор эркын да ласкан тарвана, тудо ик шагатыште 65 наре меҥгым каен сеҥа. Тарваныме годым Чебоксарысе Эҥер портын мотор тӱсшӧ веле шеҥгелан кодеш. Судно уто йӱкым лукде, ончыко чыма. Туштыжо – кумда Юл эҥер, курыкла, ужар чодыра ден ялла-влак койыт.
Ийме годым транспорт ятыр вӱдтолкыным луктеш, тыгодым айдеме шкешотан терапийым эрта. Мый денемат тыгакак лиймыла чучо: чыла событий-влак мондалтыт, лач йырым-йырысе мотор пейзаж дене ракатланет. Ик шагат моткоч писын эртымыла чучо. Автомашина дене кудалмым таҥастараш гын, тушто изиш нойымым шижат. Вет асфальт корнышто вес машинам колташ але вучаш, иктаж вере чарнен шогашат логалеш. Адакшым кеҥежым чот шокшо игече йӧндымылыкым луктеш.
Ты кечын Метеор 125Р Озаҥ гыч Угарман марте корным шуэн. Такшым тудо кажне кечын, тыгела-тугела коштеш. Ик кечын Озаҥыш кая гын, вес кечын – Угарманыш. Арнялан ик гана Ульяновск марте маршрутым куча, шочмын – транспорт кана, огеш кошт.
Ятыр ий вученыт
Чебоксарыште ятыр пассажир Козьмодемьянск марте шинчын ыле. Нуно судно дене кошташ пеш йӧнан манын, палемдышт. Метеорын кошташ тӱҥалмыжым кумло утла ий вучымышт нергенат ойлышт. Тыгак автобус але газель деч корно ак утыжым огеш ойыртемалт, тынарак маньыч (340 теҥге).
Козьмодемьянскыште тений у причал пашам ышташ тӱҥалын. Ондакысе верже деч изиш гына ӧрдыжтырак верланен. Тушко миен шогалме деч ончыч, шола могыр серыште кугу буква дене «ВАСЮКИ» манын возымым ужаш лиеш. Тудым шекланымеке, икмыняр тат гыч судно причалыште шогалмыжым умылет.
Отпускым пайдалын
Нижний Новгород марте кайыше пассажир Дмитрий Бушуев дене палыме лийым. Тудо Метеор дене каен ончаш кузе кумылаҥмыж нерген ойлыш:
– Юл вӱд гоч Метеор 125Р транспортын Нижний Новгородыш маршрутшо почылтмо нерген пален налмеке, тудын дене шинчын коштын ончышаш ыле манын шоналтенам. Кызыт отпускышто улам, садлан тидлан жап лектын.
Суднош Озаҥ олаште шинчынам. Тушко лӱмын электричке дене кудалынам. А мӧҥгешла Метеор дене пӧртылам. Мыланем у транспорт дене коштын ончаш оҥай, тиде у опыт. Ты транспорт ала-можо дене тыглай комфортабельный поездым ушештара. Моткоч йӧнан, сервисын кӱкшӧ уровеньжымат палемдынем, мыланем пассажир семын шинчыме верын йӧнан улмыжо кумылым нӧлта. Но маршрутын Озаҥ гыч Нижний Новгородыш кандаш шагат наре кайымыже кужунла чучеш. Конешне, ты жапыш тӱрлӧ вер дене палдарымаш пура, тыге корнын кужу улмыжо ок шижалт.
Дмитрий ты гана шкетын ыле, но йолташыже да родыжо-шамыч тудын деч Метеор кузе эртыме нерген йодыштыт мане. Садлан нунын дене пырля Юл эҥер гоч эше эрташ кумылжо улмо нерген ойлыш.
Чыла увер – сайтыште
Метеор 125Р вӱд транспортын кузе да кунам кайымыжым, билетын акше мыняр теҥге шогымым, «Водолёт» компанийын сайтыштыже раш ончыктымо. Тидын нерген ты компанийын коммерческий директоржо А.В.Нефедов тыгерак мане:
– 2024 ийысе навигаций шке пашажым тӱҥалмеке, Нижний Новгород гыч Озаҥыш пассажир-шамычым шупшыктышо скоростной Метеор 125Р судном колташ тӱҥалме. Тудын Чебоксар, Козьмодемьянск олаласе причалыште шогалмыжымат палемдыме. Марий Элыште илыше-влак Козьмодемьянск оласе причалыште шинчыт. Лишыл жапыште транспорт Маринский посадыште шогалаш тӱҥалеш. Тидыже пассажир-влаклан Козьмодемьянск гыч тушко кошташ йӧным ышта. Билетын акшым, рейсым «Водолёт» компанийын сайтыштыже эскерыман.
Судно 120 наре пассажирлан келыштаралтын. Марий Эл гыч ятыр еҥ ты транспорт дене пайдалана. Тачысе кечылан Марий кундемыште илыше тӱжем утла еҥ тудын дене кӱлеш верыш миен шуын. Май тылзе гыч чылаже кандаш тӱжем утла пассажир Метеор 125Р транспорт дене коштын.
Вӱд йымалсе шулдыран транспорт дене кеч ик гана да коштын ончыманак. Тидым отпуск жапыште але тыглай канышым эртарыме годым ышташ поснак пайдале. Ӱшандарем, тудо ятыр жап чондам ырыкта, а шарнымаш курымеш илаш тӱҥалеш.
Авторын фотожо-влак.