Тений март мучаште Йошкар-Олаште эртаралтше «Михаил Мурашко йолташыже-влакым ӱжеш» IХ конкурс-фестивальыште марий койышым вес кундем гыч толшо кок коллектив ончыктен ыле. Иктыже, Мишкан районысо «Юго» куштышо калык ансамбль шкешотан номерже дене II степенян лауреат лӱмым сулыш. Конкурсышто тудо «Марий сӱан темылан фантазий» ден «Кандыра» куштымаш-влакым ончыктен. А коллективым вуйлатыше Алексей Ахмазович Иванов «Хореограф-постановщик» номинацийыште III степенян лауреат лие. 18 майыште ансамбльым да Пӱнчер тӱвыра пӧртым вуйлатыше А.А.Ивановлан 65 ий темеш.
«Юго» шомакым колмеке, тидыже мо лиеш манын шоналтышым, вет ты шомакым ойлымаш уке. Рушлаш кусараш гын, «наследник» але «наследие» манме лиеш. Тугеже «Юго» коллективат акрет марий-влакын тӱвыраштым, поянлыкыштым кӱсынлен але юго семын шкаланже налын манаш шотлан толеш. Ятыр коллектив ожнысо йӱлам, фольклорым шымлен, тачысе тукымлан намиен шукташ тырша. Ты шонымаш денак 1986 ийыште ансамбль чумыралтын. Но тунам тудо «Пӱнчер ял» маналтын.
Алексей Ахмазович 1975 ий годсек Ленинградыште илен, «Звезда» машиностроительный заводышто пашам ыштен. Яра жапыште бальный куштымашым тунемын, заводышто физрук лийын. Марий мурым колыштмеке, ушыж дене тӱрлӧ движенийым ыштыме нерген шонкален. Тыге шӱм-чонжо дене ансамбльым шочыкташ йодын. 1986 ийыште шочмо кундемыштыже лиймеке, тидым Марина пелашыжын полшымыжлан кӧра шуктен кертын. Ешыштышт шым йоча кушкын. Нуно чыланат ансамбльыште мурен-куштат. Такшым А.Ивановын ынде кум ансамбльже уло. Пелашыже, Марина Андрияновна, «Вӱд толкын» мурышо да куштышо ӱдырамаш ансамбльыште мастарлыкшым ончыкта. Кугурак йоча-влак «Юго» ансамбльын тӱҥ составышкыже коштеш. А изиракышт, 3-шо классыште тунемше Дима, «Юго» ансамбльын йоча группыштыжо куанен выступатла. Тудо 9 Майлан пӧлеклалтше концертыште моло участник дене пырля выступалтлен.
Алексей Иванов Пӱнчер ялым кече гай волгалтараш полшен да кызытат яллан, районлан да шочмо марий калыкшылан куан тулым чӱктымаште тырша, марий-влакын талант памашыштым шийым-шӧртньым ешарен шога. Алексей Ахмазовичын шындыме «Шошо», «Ял мучаште», Ӱдыр модыш», «Шошо пеледыш» да моло куштымашыже-влаклан тӱрлӧ наградым кучыктеныт. 2009 ийыште ансамбльлан калык лӱмым пуэныт. Ты ий годсекак тудо «Юго» маналтеш.
Пӱнчер тӱвыра пӧртым вуйлата манме ой пеш чаплын шокта, но тӱвыра пӧртым кок ий ончыч аварийный состоянийыште улмыжлан петыреныт. Сандене ансамбль-влак кызыт Пӱнчер школышто верланеныт, тысе спортзалыште репетицийым эртарат. 1947 ийыште чоҥымо зданийым олмыкташ шотлан ок тол, маныт. Тугеже тыгай уста хореограф ден чапле коллектив-влак улмо годым районысо администрацийлан тӱвыра пӧртым чоҥымо пашам планышке пуртыман.
А.Ивановынак шонымашыж почеш Пӱнчерыште «Кушталташ йодеш чонемже» марий калык куштымаш фестиваль-конкурс эртаралтеш. Кодшо ийын тушко Калтаса, Пӱрӧ, Нуриман районла гыч 19 ансамбль мастарлыкшым ончыктен. Ты мероприятийлан Балтач район полшенак шога, сеҥыше-влаклан призым кучыкта. Тений 11 июньышто фестиваль-конкурс Пӱнчер ял воктенысе сылне олыкышто лиеш.