Татьяна Хамитова школышто тунеммыж годымак кусарыше лияш шонен. Ынде ты шонымашыжым илышыш шыҥдара.
Ӱдыр Пошкырт кундем Мишкан район Ардаш ялыште шочын-кушкын. Тысе школышто шинчымашым поген. Школыштак тудо англичан йылмым йӧратен тунемын. Тыгак олимпиадылаште шинчымашыжым терген. Тӱрлӧ мероприятийышке ушнен. Яра жапше годым ӱдыр тӱвыра пӧрт пеленысе «Акарт» ансамбльыш коштын. Тудым ачаже Владимир Хамитов вуйлата. Тыгак Татьянан ешыжын «Акарт» еш ансамбльышт уло. Коллективын лӱмжӧ тораште огыл верланыше курык лӱм дене кылдалтын.
– Ансамбль дене Санкт-Петербургыш, Чебоксарыш, Йошкар-Олаш, Челябинскыш, Татарстан кундемыш да шкенан республикнан тӱрлӧ районышкыжо миен коштынна. Вес кундемын пӱртӱс, йӱла, йылме ойыртемжым ужаш-колаш келша. Тыге миен-коштмо деч вара шочмо йылмым чотрак аклаш тӱҥалат, – ойла Таня.
Кызыт Т.Хамитова Нижневартовскысо кугыжаныш университетыште кусарыше лияш ямдылалтеш, нылымше курсышто тунемеш.
– Мыйын профессий шкешотан да оҥай. Адакшым шуко мутым палыман, тудым предложенийыште чын кучылт моштыман. Тылеч посна йылмын культуржым шотыш налман. А эн неле чыла тиде информацийым вуйышто кучаш да жапыштыже шонен муаш, – каласыш ончыкылык кусарыше.
«Мо дене тыйым англичан йылме сымыстарен?» йодмемлан Таня тыге вашештыш: «Вес йылмым палымем эре шуын. А англичан йылме чыла вере гаяк кучылталтеш. Тыгак вес йылме дене мутланыме ала-могай Ю мутым ойлымыла шокта».
Тунемме деч вара Татьяна Нижневартовск оласе марий-влакын ушемышкышт коштеш. Тудым Валентина Баширова вуйлата. Ӱдыр-рвезе-влак мурат, куштат, тӱрлӧ сценкым ямдылат.
Тыгак Татьяна кидпашамат ышта. Школышто тунеммыж годымак машинке дене ургаш кумылаҥын, эсогыл У ийлан тувырымат шканже урген. Кызытат жапын-жапын тиде сомылым шукта.
Студент годым илыш шолеш: тӱрлӧ мероприятий, ансамбль, йолташ-влак дене вашлиймаш да молат. Тиде сылне пагытын ямжым тичмашнек шижман, туге гынат тунемынат шуктыман. Тачысе геройна чолга, весела да чыла шке жапыштыже ышта. Адакшым кызыт тунемаш шуэнрак коштыт, шуко занятий дистанционный йӧн дене эртаралтеш манын палдарыш Таня. Тидыже жапым аныклаш да вес сомылымат ыштен шукташ йӧным пуа.
Ӱдырын альбомжо гыч налме фото.